Đại tá ồng Trần Văn Quyển, Mpồl ling dờng dimơ 146 pà gĭt: Ngai 8/5/1978 là tềl lời wơl kah yau kwơ màng, pờ geh gùng lòt pa bơh dùl mpồl ling cèng tàm să he dê gơnoar broă is ồn dờng màng: Bơt bơtàu mpồl ling rcang gàr lài tam lơh sền gàr bồt, sơr băc mhar bè ờs mpồl, bơsong tơl bơta suơ̆i siar bơh sơn rờp, hời rơ hời bơt bơtàu ală jơnau sồr pal lơh jat, bơyai lơh pơlam tàp, bơt bơtàu ală gùng dà broă lơh tam lơh sền gàr bồt. Lòt gan 48 nam, Mpồl ling dờng dimơ neh gơ gơs mpồl ling tờm tàm atbồ, sền gàr ală bồt Trường Sa. Mìng kờp is tàm pơgăp 10 nam do, mpồl ling gĭt gŏ rlau 5 rơbô dơ̆ sền gĭt bơta aniai tềng hơđang kơl wàng trồ, tàm dà lềng; di tŭ tă pơgồp jơnau đơs, bơsong geh cồng nha ală bơta digơlan gơlik geh, ờ gŏ di lời gơlik geh rơmơ̆p ndơl, nisơna; lơh mờr 150 dơ̆ jòi dong kờl rềs àr; dong sơm mhar, sơm mờr 1 rơbô 500 dơ̆ làng bol lơh ka; dong dŭi hoài mờr 6 rơbô nơm ơhò lơh ka gơtìp rềs àr rê tàm tiah ơm lơngăp lơngai.

Jat Đại tá ồng Trần Văn Quyển, tŭ do, tềng đăp jơnau sồr kơnòl broă sền gàr gơnoar tờm dà lềng bồt bơlào tàm bơta pa, Mpồl ling dờng dimơ 146 sùm tơnguh cồng nha pơlam tàp, bơta chài crăp rcang tam lơh, bơt bơtàu Mpồl ling dờng dimơ kơ̆ pràn tơl làm:

“Mpồl ling dờng dimơ sùm bơsram lơh jat jrô ơnàng làm uă gùng dà broă lơh pơlam tàp “bơh sơnrờp, ngan ngồn, kơnhăp kơ̆”; lam lơh pơlam tàp rềp mờ kơnòl broă, rềp mờ cau tam lơh, rềp mờ bơta geh ngan tiah tam lơh dà lềng bồt bơlào. Mơkung gàr niam mpồl ling, rơndeh rơndồ măi mok ơm gak crăp rcang tam lơh, tơnguh uă bơta pràn bơsong ală bơta digơlan gơlik geh, ờ gơtìp lời gơlik geh rơmơ̆p ndơl, nisơna tàm tơl ală bơta”.

Ờ mìng sền gròi tơnguh uă cồng nha pơlam tàp, crăp rcang tam lơh lơm, Mpồl ling dờng dimơ 146 gam is ồn sền gròi bơt bơtàu nùs nhơm khin cha cíñ trị, nùs nhơm lơh ngan uă ai mpồl ling tiah ƀồt ngài in. Tàm tiah is ồn bềng tơngai mờ càl, ngài tiah ù gờl, kong mờ uă kal ke, bơta lòng, broă lơh bơto bơtê cíñ trị, bồ tơngoh sùm geh kấp ủy, đơng lam ală kấp lam lơh sùm, geh cồng nha, dong kwang bàng, cau ling sơlơ kơ̆ nùs tàm tiah dà lềng rơya dờng. Đại tá ồng Phạm Văn Thọ, Cíñ ủy Mpồl ling dờng dimơ 146, Tiah 4 Ling dà lềng đơs sùm:

“Bol añ neh lam lơh ring bal ală broă lơh, tàm hơ̆ is ồn sền gròi tus broă lơh bơto bơtê bơhiàn ờs mờng nàng kờñ lơh kah wơl ai tơl nă kwang bàng, cau ling in bơta chờ hờp, pơn yờ să bè bơhiàn ờs mờng bơh Mpồl ling Trường Sa Khin cha jak chài dê. Bơh hơ̆ bơt bơtàu ai kwang bàng, cau ling in nùs nhơm khin cha cíñ trị kơ̆ nùs, kơ̆ dơn, nùs nhơm lơh ngan tam lơh; đòm jat niam nùs nhơm Cau ling Wa Hồ dê- là cau ling Ling dà lềng; crăp rcang tam lơh, phi să nàng sền gàr kơ̆ kơl jăp gơnoar tờm dà lềng, bồt bơlào, tiah tơr è dà lềng dờng màng bơh Dà lơgar dê tàm tơl ală bơta digơlan gơlik geh”.

Đòm jat niam bơhiàn ờs mờng mpồl ling 2 dơ̆ geh pà sră jờng rơ Khin cha jak chài Mpồl ling phàu crong Làng bol, tŭ do, tàm ală bồt gơwèt ală bồt Trường Sa, kwang bàng, cau ling Mpồl ling dờng dimơ 146 kung gam ngai mang ià kơ̆ ngkơr phàu, kơ̆ nùs kơ̆ dơn sền gàr gơnoar tờm dà lềng, bồt bơlào dờng màng bơh Dà lơgar tờm dê. Bulah ală bơta lơh broă gam uă bòl glar kal ke, mơya tơl nă cau ling Trường Sa sùm sền gĭt loh kơnòl, sền bồt là hìu, dà lềng dờng là ƀòn lơgar tờm. Trung tá Trần Huy Phụng, Cíñ trị viên bồt dờng Trường Sa đơs nền:

“Kwang bàng, cau ling tàm bồt sùm kơ̆ ngan nùs nhơm ờ tŭ lơi tam gơl nùs nhơm khin cha cíñ trị, nùs nhơm kơ̆ dơn ờ gŏ bài kong. Tàm khat dùl bơta lơi, bulah pal phi să bol añ kung gam kràñ cê jơh nùs sền gàr kơ̆ kơl jăp gơnoar tờm dà lềng bồt bơlào dờng màng bơh Dà lơgar dê”.

Pơn yờ să cơnđoà lòt jat bơhiàn ờs mờng bèp bi lòt lài dê, rơnàng kwang bàng, cau ling kơnòm să bơh Mpồl ling dờng dimơ 146 tŭ do gam pơn jat tai pơlam tàp, tă pơgồp dà kơl hề, pơgồp bơnah bơt bơtàu mpồl ling kơnhăp pràn tơl làm, lơh krơh niam pơn rơ jak. Trung tá Nguyễn Thành Vũ, Kwang bàng kơnòm să Mpồl ling dờng dimơ 146, Tiah 4 Ling dà lềng pà gĭt: Geh lơh broă tàm mpồl ling 2 dơ̆ Khin cha jak chài Mpồl ling phàu crong Làng bol là bơta chờ hờp, pơn yờ să dờng ngan gơwèt mờ tơl nă kwang bàng cau ling Mpồl ling Trường Sa dê:

“Añ pơn yờ să ngan là ling geh griăt kơnòm să bơh Mpồl ling Trường Sa khin cha dê. Añ rơ̆p sùm lơh ngan sơrlèt gan tơl kal ke pơgồp bơnah sền gàr kơ̆ kơl jăp tơl tấk bồt bơlào, dà lềng dờng màng bơh Dà lơgar dê”.

Lòt gan mờr 50 nam, bơh ală ngai sơn rờp rơbô bơta bòl glar kal ke, phan bơna suơ̆i siar, ală rơnàng kwang bàng, cau ling Mpồl ling dờng dimơ neh tơnguh nùs nhơm kơ̆ dơn, nùs nhơm ơm kơ̆ tàm dà lềng, sền dờng màng jơnau sơntơm să: “Chơ̆t phi să rlau mờ lik bơh bồt; roh să jan rlau mờ roh tĕ gơnoar tờm”. Sơr lèt gan càl rơbŭt dờng sùm mờ ală bơta gơlik geh kal ke tàm dà lềng, tàm dà lềng Trường Sa tŭ do, ală cau ling Ling dà lềng kung gam ngai mang ngết ngơ̆t ơm gak sền gàr dà lềng Dà lơgar tờm mờ nùs nhơm kơ̆ dơn, nùs nhơm geh kơnòl uă mờ bơta kơ̆p kờñ tă pơgồp dà kơl hề sùm. Bơh tiah dà lềng rơya dờng, bơhiàn ờs mờng khin cha bơh Mpồl ling Trường Sa dê kung gam geh cih tai mờ ală cồng nha lơh geh pa tàm broă lơh sền gàr gơnoar tờm dà lềng, bồt bơlào dờng màng bơh Dà lơgar tờm dê.