Càr Dăk Lăk tŭ do gam lam lơh bơt bơtàu 3 nơm hìu bơsram ală kấp tàm ală sàh tiah nhàr lơgar: Ia Lốp, Ia Rvê mờ Ea Bung, mờ jờp jơh priă bơcri lơh mờr 127 tơmàn đong. Tus tŭ do, uă bơta broă tờm tàm broă lơh bơt bơtàu neh lơh geh pơgăp 47% mpồl broă lơh.

Tềng đăp jơnau sồr pal lơh sir ring bal ală hìu bơsram nàng di tŭ ai mŭt ngui tàm nam bơsram pa, Ƀí thư Tỉñ ủy càr Dăk Lăk ồng Lương Nguyễn Minh Triết sồr ală mpồl mut lơh broă kờp sền wơl tŭ tơngai mut lơh, ai tai mpồl cau lơh broă, phan bơna măi mok; mơkung jàu gah bơto bơtê in rcang lài săc rơwah kơnòm bơsram, ai cau pơgru, rcang lài phan bơna măi mok bơto bơsram, tiah ơm sa bĭc tơn tàm hìu bơsram mờ lơh broă rơndăp lơh mblàng yal, hòi jà kơnòm bơsram tus tàm ơdŭ bơsram bơh tàm tơngai bồ nam bơsram. Càr Dăk Lăk kung sồr rcang tơl làm kòi phe, phan ngui sa, gàr niam sàng goh phan ngui sa ai kơnòm bơsram ơm sa bĭc tơn tàm hìu bơsram in, gàr niam hìu bơsram lơh sir là gơtùi bơyai lơh bơto mờ bơsram tơn. Pal sền gròi ngan là, Ƀí thư Tỉñ ủy càr Dăk Lăk sồr rcang lài gùng dà broă lơh hòi jà mpồl cau dong kờl mut lơh broă dilah kờñ pal geh, tàm hơ̆ geh broă lơh pơgồp bal mờ mpồl ling klàng nàng tơnguh tai tŭ tơngai mut lơh broă lơh bơt bơtàu, lơh sir lài mờ ngai 30/7.