Drim ngai 13/5, tàm dar tơn jơh Pơrjum dờng cau ala mat gùt lơgar Mặt trận Dà lơgar Việt Nam dơ̆ XI, tơngai lơh broă bơh nam 2026-2031, ala mat Mpồl Củ tịc Anih duh broă Mặt trận Dà lơgar Việt Nam, mò Hà Thị Nga, Phó Củ tịc – Kwang gơnoar cih dờng Anih duh broă Mặt trận Dà lơgar Việt Nam khoă XI neh yal jơnau yal cồng nha Pơrjum dơ̆ dùl Anih duh broă Mặt trận Dà lơgar Việt Nam khoă XI, tơngai lơh broă bơh nam 2026-2031. Ƀí thư Đảng Dà lơgar, Ƀí thư Đảng ủy Mặt trận Dà lơgar, ală mpồl cau dà lơgar, Củ tịc Anih duh broă Mặt trận Dà lơgar Việt Nam khoă X mò Bùi Thị Minh Hoài, pơn jat tai geh pin dờn uă, pơrjum bơyai pồ at gơnoar broă Củ tịc Anih duh broă Mặt trận Dà lơgar Việt Nam khoă XI, tơngai lơh broă bơh nam 2026 – 2031.

Đơs dờp at kơnòl broă, Củ tịc Anih duh broă Mặt trận Dà lơgar Việt Nam khoă XI mò Bùi Thị Minh Hoài hơ gàr kơ̆ nùs nhơm khin cha cíñ trị, nùs nhơm broă lơh; jơh nùs, jơh tồr, jơh bơta pràn, lơh jat niam làng bol lơh tờm, bồ tơngoh jak, tơnguh uă nùs nhơm geh kơnòl, pơn đơl pràn lơh ngan, lơh sir niam ngan kơnòl broă geh jàu. Bal mờ hơ̆, gàr kơ̆ bơta tam klăc bal, ring bal; ngăc ngar, bơceh lơh, tam gơl pa, tơrgùm lam lơh ring bal ală kơnòl broă, broă lơh nàng lơh tus geh Jơnau lơh nền tàm pơrjum bơh Pơrjum dờng dê ai, pơgồp bơnah lơh kơ̆ kơl jăp mpồl tam klăc dờng gùt jơi bơtiàn, đơs nền loh làng gơnoar broă, kơnòl broă bơh Mặt trận Dà lơgar Việt Nam dê tàm tơngai kăc màng pa.