Dơ̆ lơh broă tơrgùm tàm Rơndăp broă lơh “Tơngguh tai jơnau tơl pràn kong jai bơh broă lơh sa sươn sre dềt mờ gàr tơl dà tài bơh tam gơl nhơm trồ tiah kơnhoàl ù tiah Tây Nguyên mờ Đah Jum tàm gùl lơgar (SACCR) mờ Rơndăp broă lơh dềt “Lơh dờng wơl, lơh ală bơtơ̆t rbòng dà drơng tuh dà ai chi tam ù gờl in” gơ wèt Rơndăp broă lơh “Tơngguh uă cồng nha ngui dà ai ală càr kong gơrềng tài bơh trồ prang soăt dà” (WEIDAP) ngui priă càn Anih priă jền Bơtàu tơngguh câu Á in (ADB). Tơnơ̆ mờr 5 nam lam lơh tàm Dăk Lăk, Rơndăp broă lơh SACCR neh pơgồp bơnah tơngguh uă pràn jak gơdờp mờ tam gơl nhơm trồ tiah, bơtàu tơngguh broă lơh broă sa mờ dong kờl pơlam gùng bơtàu tơngguh broă lơh sa sươn sre tơlik nhơm ƀơ̆ dồ êt ai làng bol ƀòn lơgar in. Bulah bè hơ̆, uă broă kwơmàng bơh rơndăp broă lơh dê, is ồn là tơngai pơrgon lơh ală anih ƀồm dà pa ai priă rlau 41 tơmàn đong, ờ hềt ndrờm mờ 4% kờp jơh priă ODA dê.

Tàm dơ̆ lơh broă, ala măt UNDP tàm Việt Nam đơs niam ngan lơh ngan càr Dăk Lăk dê tàm lam lơh rơndăp broă lơh, mơkung đơs sùm do là rơndăp broă lơh geh kwơ is ồn kwơmàng ngan gơ wèt mờ gàr tơl dà mờ broă lơh broă sa bơh làng bol dê. Ala măt UNDP sồr Dăk Lăk mhar lơh sir sră nggal tam gơl wơl rơndăp broă lơh, gờñ ai lơh jăt ală sră nggal gơrềng tus tam gơl wơl khà tàm pơndrờm giă priă mờ tơn jŏ tơngai lơh jăt rơndăp broă lơh tus nam 2027.