Jơnau tơngit do geh Ƀộ Broă lơh sa suơn sre mờ Tiah ơm kis yal tàm Pơrjum “Yal, mblàng yal ală jơnau cih bè kloh niam ờdo ờdă phan sa mờ gròi sền kòp phan ròng, phan tam tàm Jơnau kĭ hơ Lơh broă bal lơh sa tơl làm kơnhoàl ù tiah (RCEP) mờ Jơnau lơh nền Cíñ phủ sồ 280 bơh lơgar Lo dê ngai 14/5. Pơrjum geh bơyai lơh tàm càr Dăk Lăk mờ pờ tơlik tàm internet tơrbŏ tơn tus 34 anih tàm dà lơgar bal mờ ală càr, ƀòn dờng tàm gùt lơgar. Jat jơnau yal, tơngai lài, ală mpồl lơh sa kă bro neh rơcang lài gơ dờp mờ tam gơl drà kă bro, lơh gơs niam ală sră pơrgon tac blơi phan. Ală mpồl lơh gơlik phan gam lơh ngan lơh niam jơnau sồr broă rơndap lơh bè lơh màh sồ tiah tam, gròi sền kòp mờ jòi git anih lơh gơlik nàng lơh jat ală jơnau sồr pa bơh drà blơi phan dê, ngan là ală jơnau cih bơh ală Jơnau kĭ hơ kă bro phan. Bulah bè hơ̆, phan lơh gơs bơh suơn sre Việt Nam dê gam pal kong mờ ală jơnau sồr bơta chài măi mok ngai sơlơ kal ke bè kloh niam ờdo ờdă phan sa mờ gròi sền kòp. Is ồn, đah lơgar Lo gam sơlơ atbồ kràñ ngan phan sa blơi bơh lơgar ndai, tơrgùm nền tàm màh sồ tiah tam, anih ơn tàm kơldung, gròi sền jơngkah khà sơnơm sền gàr phan tam, top mat sơnđan phan kă bro mờ jòi git anih lơh gơlik.

Pơrjum do yal ală jơnau tơnggit, jơnau cih pa bè kloh niam ờdo ờdă phan sa mờ gròi sền kòp phan ròng, phan tam tàm Jơnau kĭ hơ Lơh broă bal lơh sa tơl làm kơnhoàl ù tiah, Jơnau lơh nền Cíñ phủ sồ 280 mờ bàr pe jơnau yal bơh Tổng kụk sền swì dia phan lik mờ mut tàm lơgar bơh lơgar Lo dê bè atbồ cih mat mpồl lơh sa kă bro lơh gơlik phan sa lơgar ndai blơi tơmut tàm lơgar Lo nàng mpồl atbồ, mpồl lơh sa kă bro, mpồl lơh broă bal, làng bol lơh broă sa in git mờ lơh jat, gàr niam ală jơnau sồr ai tơlik.