Drim òr (05/12), Tổng Ƀí thư ồng Tô Lâm đơng lam dơ̆ lơh broă mờ Mpồl duh broă Đảng ƀộ càr Ninh Thuận bè cồng nha lơh jăt Jơnau lơh nền tàm Pơrjum dờng dơ̆ 13 bơh Đảng dê mờ jơnau lơh nền tàm Pơrjum dờng Đảng ƀộ càr dơ̆ 14 tơngai lơh broă bơh nam 2020 tus 2025; broă bơyai lơh jăt Jơnau sồr bơh Ƀộ Cíñ trị mờ ală sră nggal bơh Dà lơgar bal mờ broă lơh jăt gùng dà broă bơcri priă Rơndăp broă lơh ồs đèng hạt ñân Ninh Thuận tàm tơngai do.

Jơnau đơs dŭt ndơl dơ̆ lơh broă Tổng Ƀí thư ồng Tô Lâm đơs nền làng bol càr Ninh Thuận mờ ală càr rềp bal tam pà bal, ai geh bơta pràn ù tiah, phan geh is nàng bơtàu tơnguh rơndăp broă năng lượng drơng tàm broă bơtàu tơnguh ai gùt lơgar in, di gơlan pal geh tam pà bal, dờp bal ală cồng nha lơh geh di pal bơh broă bơtàu tơnguh dê. Đảng mờ Dà lơgar rơ̆p gàr niam broă rơwah ală phan măi mok pa lơh broă niam ngan, rơwah ală cau lơh broă bal pơlam niam ngan, bơto cau lơh broă atbồ jăk ngan nàng gàr niam broă lơh lơngăp lơngai mờ geh cồng nha rơndăp broă lơh năng lượng do bơh dà lơgar dê, ờ mìng tài rài tŭ do mờ gam ai rài oh kòn tơnơ̆ do in tai.