Jờng uă ngan jơnau yal cồng nha bè broă lơh bơt bơtàu Đảng, ală anih lơh broă cíñ trị, bơtàu tơnguh lơh sa- mpồl bơtiàn, sền gàr Dà lơgar- lơngăp lơngai, lơh broă mờ lơgar ndai bơh ƀòn dờng dê, Tổng Ƀí thư ồng Tô Lâm pà gĭt, Dà lơgar sền gĭt Hà Nội là Đảng ƀộ tờm, đảng ƀộ lơh krơh lam lài, kơ̆p kờñ ƀòn dờng rơ̆p jơh nùs lam lơh ală jơnau lơh nền tàm pơrjum bơh Đảng dê gờñ ai  mut lơh tàm rài kis, tus mờ ală kấp hơ đơm, tơl nă kwang bàng, đảng viên.

Bơdìh mờ kơ̆p kờñ Hà Nội gơ gơs ƀòn dờng gơguh lơh sa tàm tiah do mờ gùt lơgar dê, tề lam gơguh lơh sa ai ală càr gùt dar in, Tổng Ƀí thư kung sồr Hà Nội pal gơ gơs anih tờm bơh tam gơl pa bơceh lơh. Bè kơnòl broă tềng đăp mat, Tổng Ƀí thư ồng Tô Lâm sồr Hà Nội pal tơrgùm lơh jat niam Jơnau sồr sồ 35 bơh Ƀộ Cíñ trị dê bè pơrjum dờng đảng ƀộ ală kấp lơh tus Pơrjum dờng cau ala mat gùt lơgar dơ̆ 14 bơh Đảng dê jat di mờ broă rơndăp lơh.