Lơh jat broă lơh tìp mat mờ cau tĕ khà tơnơ̆ pơrjum dơ̆ 8, Quôk hội khoă 15, mho ngai 02/12, tàm Hưng Yên, Tổng Ƀí thư ồng Tô Lâm bal mờ mpồl cau ala mat Quôk hội càr geh dơ̆ tìp mat mờ uă ngan ală cau tĕ khà tàm ù tiah ƀòn dờng Hưng Yên dê nàng yal cồng nha pơrjum dơ̆ 8 mờ hơ ală jơnau lùp bơh ală cau tĕ khà dê pơyoa tus Quôk hội.

Tơnơ̆ tŭ iăt ala mat Mpồl cau ala mat Quôk hội càr Hưng Yên yal ală cồng nha duh hồl bơh pơrjum dê, uă ngan cau tĕ khà tàm ù tiah ƀòn dờng tơngŏ bơta chờ hờp Dà lơgar, Quôk hội, Cíñ phủ rơ̆p pơn jat tai lơh pràn rơndăp tăp sèng mpồl lơh broă anih lơh broă Đảng, Dà lơgar. Đơs nền, do là gùng dà broă lơh di ngan rơ̆p là dơ̆ lơh broă tơrmù niam mpồl lơh broă Dà lơgar, tơnguh uă cồng nha lơh broă bơh anih lơh broă Dà lơgar dê, pơgồp bal mờ tơrmù cau lơh broă, tơrmù priă tă mpồl cau lơh broă bơh ală anih lơh broă cíñ trị bơh Dà lơgar tus ală tiah, pơgồp bơnah tơnguh ală priă jền kes priă dà lơgar ai bơcri priă bơtàu tơnguh mờ lơh jat broă lơh gàr niam lơngăp lơngai, bơta kwơ bal mpồl bơtiàn.

Mho dùl ngai bal, Tổng Ƀí thư ồng Tô Lâm neh tus còp  pà phan ai ồng Mai Văn Vĩnh, 73 sơnam, cau ling kòp tê jê să 81%, hìu bơnhă geh màng mờ dà lơgar tàm ù tiah xã Liên Phương mờ hìu bơnhă mò Bùi Thị Kiêng, deh nam 1940 ơm tàm gùng Bạch Đằng, sơnah ƀòn Minh Khai hìu bơnhă kal ke geh uă lơh ngan brồ guh tàm rài kis dê.