Tàm dơ̆ pơrjum bơyai, bàr gah đơs niam bơta git gơ̆p sền gàr dà lơgar đah bàr lơgar ngai sơlơ bơtàu tơnguh, pơgồp bal niam tàm bơta ring lơngai, kơ̆ kơl jăp tàm tiah do. Đại tướng ồng Phan Văn Giang ưn ngài lơgar Singapore neh dong kờl priă bơsram, dờp ling geh groăt lơgar Việt Nam lơh broă tàm Anih tờm tam pà bal jơnau tơngit lơngăp lơngai gùng lòt tàm dà lềng.

Ƀộ trưởng ồng Chan Chun Sing tơlik nùs nhơm kơ̆p kờñ tơnguh lơh broă bal tàm ală gah broă, tàm hơ̆ uă ngan là tàm broă bơto cau lơh broă mờ tam pà bal jơnau tơngit lơngăp lơngai. Ồng đơs tŭ lơi kung rơcang dờp ling geh groăt lơgar Việt Nam tus bơsram tàm lơgar Singapore, pơgồp bal tàm broă tơnguh uă bơta pràn sền gàr dà lơgar đah bàr lơgar dê tàm bơta tiah do geh uă tam gơl mờ ờ git lài.