VOV4.K’ho – Tềng đap gơlik geh kal ke bơh kòp as sồt gùng tă nhơm kơn jơ\ bơh jơi pa virus Corona dê lơh gơbàn (geh mat sơnđan là Covid-19), tơnơ\ tu\ cribơyai mờ ală lơgar geh jơng tàm mpồl ASEAN, tàm gơnoar broă là Chủ tịch mpồl ASEAN nam 2020, Thủ tướng Chính phủ, ồng Nguyễn Xuân Phúc neh tơlik Jơnau yal bơr bơh Chủ tịch ASEAN dê bè broă sơndră bal bơh mpồl ASEAN dê tềng đap bơta gơbàn ua\ bơh kòp dê.

Jơnau yal bơr do ai go\ bơta ờ suk bơh ală Kuang đơng lam bồ mpồl ASEAN dê bè bơta gơlik geh kal ke bơh kòp dê, bơta gơ rềng ua\ ngan tus rài kis làng bol mờ bơta bơtàu tơnguh bơh ală lơgar ASEAN dê kung bè tàm tiah do mờ tàm dunia. Đơs nền ală kuang đơng lam bồ mpồl ASEAN đơs ngan jơnau hơ pơrgon pràn kơldang, at tê bal sền gròi mờ kơryan bơta bơ tờp ua\ bơh kòp dê, gàr niam rài kis ring lơngai làng bol in.

Jơnau yal bơr kung đơs sùm, bơta tam klac mờ dong kờl pràn kơldang bơh ASEAN dê mờ broă lơh ngan dờng màng bơh Chính phủ mờ làng bol lơgar Lo mờ mpồl bơtìan dunia dê đơs bal tàm broă sơndră wơl kòp. Jơnau yal bơr đơs nền, ală lơgar ASEAN pơn jat tai gàr sùm broă lơh pờ mpồng; ring bal pơgồp bal tàm broă lơh sền sơ wì lơh sơnơm tàm ală mpồng nhàr dà lơgar bơh ală lơgar tàm mpồl dê, lơh broă bal geh cồng nha kơryan jơnau yal ờ ngan bè kòp Covid-19.

Cau mblàng K’Duẩn