VOV4.K’ho – Tàm [òn dờng Dà Làc, tàm dơ\ lơh Festival bơkàu dơ\ 8 nam 2019, UBND càr Lâm Đồng bơyai lơh pơrjum “Wèt tus bơt bơtàu [òn dờng Dà Làc gơs là tiah drà phan lời wơl”. 

Bal mờ ù tiah ring niam ngan bơh brê nho mờ bơkàu niam dê, bơh ală `rùh dà mờ dà dờng, dà croh dê, [òn dờng Dà Làc là tiah prap gàr ua\ phan lời wơl niam chài krơi is ngan, ngan là ală broă lơh niam chài hìu đam lơgar Tây dê.

Bulah bè hơ\, jat ală kuang bàng tus bal pơrjum đơs, broă bơtàu tơnguh tiah drà ur ar, mhar ir neh lơh niam chài hìu đam mờ tiah ơm kis [òn dờng dê gơtìp aniai ua\ ngan. Lâm Đồng pal mhar geh broă lơh kơryan bơta gơbàn ờ diơng mhar ngan bơh tiah ơm kis tơlir tàm dơlam [òn dờng dê.

Kuang đơng lam bồ càr Lâm Đồng cih dờp ală jơnau đơs tă pơ gồp tàm dơ\ pơrjum mờ pà git: càr kơ\ dơn ngan mờ broă bơt bơtàu [òn dờng phan lời wơl Dà Làc. Tơ nơ\ pơrjum do, càr geh pơn jat tai ală broă lơh kơ lôi sơ nơng nàng jòi geh broă lơh tơl làm rlau.

Cau mblàng K’Duẩn