VOV4.K’ho – Ală ngai do, git nđờ rhiang hìu bơnhă làng bol kis kềng gah dà dờng Dà Quay, gơ wèt 2 kơnhòal Dà Oai mờ Dà Teh sa ờ bokah, bic ờ lơhă tài màng kis gơtìp pơhìn. Jơnau là tài bơh gah dà dờng Dà Quay digơlan gơtìp tơrlah cò pơr dô sươn chi, hìu đam khat tàm tu\ lơi.

2 nhai do, hơ\ là kờp bơh dơ\ càl rbut dờng sồ 3 lơh aniai, bơta tơrlah tiah kềng gah dà dờng Dà Quay gơl hòr dan Tổ dân phố 1, thị trấn Dà Mri, kơnhòal Dà Oai, càr Lâm Đồng ngai sơlơ kơn jơ\ rlau. Ồng Lê Văn Tấn, 1 hìu bơnhă geh hìu tàm tiah do pà git, pah dơ\ mìu càl lòt gan den uă bă ù tiah, phan tam làng bol dê gơtìp dà dờng cò pơr dô. Bơta pal đơs là bơta tơrlah ngai sơlơ gơlik geh kal ke, tu\ do neh geh uă gơl dà dờng gơ mut jrô tàm sươn chi, lơh rlau 30 nơm hìu làng bol dê digơlan gơtìp tơrlah tơr lơm jơh tàm dà dờng: “A` kis tàm do neh rlau 30 nam, lài do dà ko\ dà cò mìng lơh aniai dùl êt lơm, mơya dơ\ do den gơ lơh aniai dờng ngan, tềng do ngai lài tu\ mìu sền bè dà lềng tơn. Tu\ do tơrlah gùng rơndeh bơh rềp gah dà dờng tus ù mat gùng dêlà 4 thơk. Nùs nhơm hìu bơnhă a` dê kung bè ală hìu bơnhă tàm do là sỳm ờ suk ngan pah tu\ trồ mìu”.

Kung bè Tổ dân phố 1, thị trấn Dà Mri sơl, dà dờng Dà Quay gơtìp tơrlah kơn jơ\ ngan tàm uă bă tiah ndai. Ồng Võ Tấn Thành, ơm tàm thôn 3, xã Dà Oai, kơnhòal Dà Oai pà git, sươn 4 sàu hìu bơnhă ồng dê tu\ do mìng gam nggùl, dilah bơta tơrlah pơn jat tai gơlik geh den ồng digơlan ờ gam ù nàng lơh sa tai: “Hìu a` dê mìng geh nđờ sàu ù do gời, ờ geh uă ù, mờ chi tam den neh tam tus 6, 7 nam. Tu\ do gơtìp tơrlah uă ir, mơya hìu bơnhă ờ git kơ lôi rơcang bè lơi tai, gơ hoàc huơr ir”.

                                                     Uă bă tơrlah tàm ală ală hìu làng bol

Tềng đap bơta tơrlah kềng gah dà dờng Dà Quay gơlik geh ngai sơlơ kơn jơ\, gơ noar atbồ ală xã, thị trấn tiah do neh tồt [àng tơngkah nàng làng bol in ba` lòt rê tàm tiah ngòt rơ ngơt tàm kàl mìu, mơkung dan ală anih lơh broă kấp hơđang mhar lam lơh broă lơh bơsong jơnau gơ lời wơl. Mơya, jat ồng Võ Văn Tuấn, Phó Chủ tịch UBND thị trấn Dà Mri, kơnhòal Dà Oai pà git, tài geh uă ir bă tơrlah den tàng broă lơh niam wơl gơtìp uă kal ke, ờ gơtùi lơh gơs tàm dùl tu\ tơngai lơyah, mờ pal geh dùl tu\ tơngai jo\ ngan: “Bol a` neh tơngkah làng bol tàm ală tiah tơrlah. Gơ wèt mờ jơng rơbàng Dà Mrê den Cục gùng lòt ù gờl gam kơt lu\ nàng lơh niam ing. Ai ală bă tơrlah tàm tổ dân phố 6, tổ dân phố 1 den ờ hềt lơh”.

Rềp mờ kơnhòal Dà Oai là kơnhòal Dà Teh kung gơbàn bè do sơl. Bơdìh mờ uă bă chi tam làng bol dê gơtìp roh jơh, uă gơl gùng lòt tàm kềng 2 gah dà dờng Dà Quay kung gơtìp aniai kơn jơ\ ngan. Jat ồng Lê Mậu Tuấn, Phó Chủ tịch UBND kơnhòal Dà Teh đơs, jơnau gơbàn tơrlah là tài bơh ù tàm tiah do ờ kơ\, bal mờ mìu sơr jo\ jòng, dà bơh dà dờng Dà Quay gơguh tih jơnhua mờ hòr nhăng den tàng lơh gơbàn gơ cò ù mờ tơrlah tàm uă tiah. Tềng đap bơta geh ngan do, gơnoar atbồ kơnhòal neh sồr ală mpồl lơh broă geh gơ noar mhar lơh niam wơl ală bă tơrlah, mơkung tơnguh jơnau git wă rơcang ngac, rơcang ai cau lơh broă tus dong làng bol ntrờ` tus bă tiah ờ do ờ dă: “UBND kơnhòal neh geh broă rơndap lơh tam dră mờ tơl bơta trồ tiah lơh aniai. Tàm hơ\ sền gròi ngan rlau jơh là tơngkah lài ală bă tiah digơlan gơlik geh dà ko\ dà cò, tơrlah ù, ngơr bam uă nàng làng bol in geh bơta rơcang lài, nàng tu\ gơlik geh bơta aniai den lam lơh ntrờ` làng bol, phan bơna tus tiah ờ do ờ dă.

            Dùl bă tơrlah kơn jơ\ ngan tàm Tổ dân phố 1, thị trấn Dà Mri, kơnhòal Dà Oai

Jat mpồl đơng lam rơcang sơndră trồ tiah lơh aniai mờ jòi dong kờl rềs àr càr Lâm Đồng yal, bal mờ broă jơh nùs bơsong jơnau gơ lời wơl bơh mìu dà ko\ dà cò lơh aniai, ală anih lơh broă geh gơ noar gam pơ gồp bal mờ gơ noar atbồ ală tiah mhar lòt sền bơta geh ngan hiòng dà hòr, sền sơ wì jơnau digơlan mờ khà lơh aniai bơh broă tơrlah ù tàm dà dờng Dà Quay dê nàng bơh hơ\ lơh niam broă tơngkah lài, rơcang lài nàng gàr niam ờ do ờ dă mờ rài kis làng bol tàm tiah gơtìp aniai in. Bal mờ hơ\, ală broă rơndap lơh bơt nàng tam gơl gùng dà hòr, tuah wàs gùng dà hòr, lơh ală bơ tơt kìng dà nàng tơmù [à bơta tơrlah ù kung pal geh kờp tus nàng bơsong bơta tơrlah bè jo\ jòng.

Cau mblàng K’Duẩn