VOV4.K’ho- Drim do 14/10, tàm Hìu Quốc hội, mu\t pơrjum dơ\ 38 Ủy ban Thường vụ Quốc hội. Geh lơh bơh ngai do tus ngai 17/10 do, uă tơngume kuơmàng geh Ủy ban Thường vụ Quốc hội ai jơnau đơs, lơh gơs nàng ai tơmu\t tàm pơrjum dơ\ 8, Quốc hội khoá 14, geh lơh tàm ngai 21/10 do.

Bè broă lơh bơ\t bơtàu kơrnoat boh lam, Ủy ban Thường vụ Quốc hội geh ai jơnau đơs bè 3 rơndăp lơh adat. Bè broă lơh gròi sền, Ủy ban Thường vụ Quốc hội geh ai jơnau đơs bè ală jơnau yal: Jơnau yal tơrgùm kờp jơh ală jơnau đơs, jơnau dan bơh cau te\ khà mờ làng bol dê pơyua tus pơrjum dơ\ 8, Quốc hội khoá 14; Jơnau yal cồng nha gròi sền broă bơsong, hơ jơnau lùp, jơnau dan bơh cau te\ khà dê pơyua tus pơrjum dơ\ 7, Quốc hội dê…

Kung tàm dơ\ pơrjum do sơl, Ủy ban Thường vụ Quốc hội ai jơnau đơs bè ală jơnau yal sền swì cồng nha lơh jat broă rơndăp lơh bơtàu tơnguh lơh sa- mpồl bơtiàn mờ kes priă dà lơgar nam 2019; broă rơndăp lơh bơtàu tơnguh lơh sa- mpồl bơtiàn, kờp du\ lài kes priă dà lơgar mờ gùng dà tam pà kes priă dà lơgar nam 2020;...

Cau mblàng Lơ Mu K’Yến