VOV4.K’ho - Ngai kơphe Việt Nam dơ\ 3 nam 2019 geh bơyai lơh tàm [òn dờng Pleiku, càr Gia Lai tàm 3 ngai, bơh ngai 8 tus ngai 10 nhai 12 nam 2019 mờ tơngu me “Bơta chài rơgơi hùc dà kơphe”, do là jơnau yal geh mpồl tam klăc kơphe Ca cao Việt Nam ai tàm dơ\ tìp mờ cau lơh broă sră [ăo geh bơyai lơh drim òr tàm Hà Nội.

Broă lơh ngai kơphe Việt Nam nam do geh ai go\ bơta chài rơgơi hùc dà kơphe bơh làng bol lơgar Việt Nam dê kung bè làng bol tàm gùt dunia. Bơh broă lơh do, geh pơn jăt tai chồl pràn broă yal khà măt kă bro kơphe Gia Lai đơs is, ală càr Tây Nguyên mờ gùt lơgar đơs bal, pơgồp bal tàm broă tơnguh uă bơta niam mờ ai tơngo\ bơngă kơphe Việt Nam tàm drà kă bro dunia.

Nam do, broă ràng tơl^k kơphe Việt Nam geh broă tus bal bơh 6 càr geh bă ù tam kơphe uă ngan lơgar Việt Nam dê.

Broă lơh do geh bơyai lơh bal mờ ală broă tus sền ală hìu măi lơh kơphe; tus sền ală suơn kơphe kơl jăp; tìp bal, pơgồp bal kă bro bơh ală lơgar tam kơphe, ală anih lơh sa kă bro kơphe tàm lơgar mờ mờr 70 anih lơh sa kă bro lơgar bơdìh tus bơh 12 lơgar.

Cau mblàng Ndong Brawl