VOV4.K’ho – Pơrjum Bộ trưởng Ngoại giao dơ\ 14 bơh Cribơyai lơh broă bal châu Á – châu Âu (ASEM) neh geh lơh tàm càr lơgar Madrid, lơgar Tây Ban Nha. Tus bal pơrjum geh ală Bộ trưởng Ngoại giao mờ Kuang atbồ mpồl kuang bàng bơh 53 lơgar geh jơng ASEM dê, geh 21 lơgar châu Á, 30 lơgar châu Âu mờ Mpồl tam klac châu Âu (EU) bal mờ Mpồl gơnoar cih ASEAN. Mpồl kuang bàng Việt Nam bơh Ủy viên Bộ Chính trị, Phó Thủ tướng Chính phủ, Bộ trưởng Ngoại giao, ồng Phạm Bình Minh lam bồ tus bal pơrjum.

Mờ tơngume “Châu Á mờ châu Âu: lơh broă bal tài rài lơh broă ua\ lơgar geh cồng nha”, pơrjum dơ\ do ai tơlik ală broă lơh ngan ngồn nàng pơn jat tai lơh niam git gơp đah châu Á mờ châu Âu tàm jơh 3 tơngume tờm là cribơyai chính trị, lơh broă bal lơh sa mờ lơh broă bal tàm ală gah ndai. Pơrjum neh ring bal jơnau yal bơr Chủ tịch, đơs nền nùs nhơm lơh ngan bơh ală lơgar geh jơng ASEM dê sơlơ tơnguh git gơp lơh broă bal châu Á mờ châu Âu tài rài lơh broă ua\ lơgar geh cồng nha, lơh broă bal tam dră mờ ală bơta lòng gùt plai ù, chồl pràn tơrbo\ bal đah 2 tiah do, mơkung ai tơlik ală gùng dà broă lơh nàng kờ` tơnguh broă lơh bal ASEM tàm tơngai tus.

Cau mblàng K’Duẩn