VOV4.K’ho – Tàm Hà Nội, Ban Dân vận dà lơgar pơgồp bal mờ Học viện Chính trị dà lơgar Hồ Chí Minh bơyai lơh pơrjum Khoa học 70 nam ngai cih jơnau “Lam sồr làng bol” bơh Chủ tịch Hồ Chí Minh dê. Đơs tàm dơ\ pơrjum, ồng Trần Quốc Vượng, Thường trực Ban Bí thư đơs nền: Jơnau cih bơh Chủ tịch Hồ Chí Minh dê là “Cuơng lĩnh lam sồr làng bol” bơh Đảng dê, ai tơnggo\ nùs nhơm pin dờn làng bol, sền dờng màng làng bol, sền dờng màng bơta pràn bơh làng bol dê tàm broă lơh kac màng bơh Đảng mờ jơi bơtìan dê, jat jơng bơhìan bơh bèp ồng he dê bè gơnoar broă bơh làng bol dê.

Ồng Trần Quốc Vượng đơs loh, ngui bơta kuơ bơh jơnau cih do dê, git loh nùs nhơm bơh Chủ tịch Hồ Chí Minh dê bè broă lơh lam sồr làng bol mờ bơta lơh broă bal bơh gùt mpồl chính trị, broă lơh lam sồr làng bol neh lơh geh uă cồng nha, pơgồp bơnah kuơmàng tàm bơtàu tơnguh lơh sa mpồl bơtìan, sền gàr dà lơgar, sền gàr lơngap lơngai, cribơyai broă mờ lơgar ndai, tơnguh niam rài kis làng bol dê, bơsong geh cồng nha bơta kơp kờ` dipal bơh làng bol dê. Ồng Trần Quốc Vượng sồr, nàng pơn jat tai tơnguh bơta kuơ lý luận, bơta geh ngan, jơnau pơrya dờng màng ngan tơngume jơnau cih “Lam sồr làng bol” dê tàm tơngai tus, pal sền dờng màng broă lơh lam sồr làng bol bơh anih lơh broă dà lơgar dê, ngan là broă lơh lam sồr làng bol bơh gơnoar atbồ dê pal ai bơta niam nùs làng bol dê là jơnau kờ` nàng lơh broă.

Cau mblàng K’Duẩn