VOV4.K’ho – Drim ngai 24/2, tàm [òn dờng Dà Làc, càr Lâm Đồng, Bộ Lao động – Thuơng binh mờ Xã hội đơng lam mờ pơ gồp bal mờ Ban Thư ký ASEAN bơyai lơh Pơrjum kuang bàng dờng màng drơng broă mpồl niam chài – mpồl bơtìan ASEAN (SOCA). 

Pơrjum geh bơta tus bal bơh mờr 60 nă kuang bàng, là ală kuang bàng dờng màng mờ kuang drơng broă mpồl niam chài – mpồl bơtìan tus bơh 10 lơgar geh jơng tàm mpồl ASEAN, Ban Thư ký ASEAN, ala mat ală bộ, gah broă lơh dà lơgar mờ ală cau jak chài pơlam tiah do dong kờl ai jơnau đơs in.

Pơrjum tơr gùm sền sơ wì, cribơyai bè tơngume, ală khà sền sơ wì kung bè broă rơndap lơh mờ tơngume tờm geh bơt bơtàu tàm jơnau yal sền wì nggùl tơngai broă rơndap lơh bal mpồl niam chài – mpồl bơtìan ASEAN. Bơh hơ\, ală lơgar geh jơng tàm mpồl ASEAN geh sền sơ wì tàm kấp dà lơgar mờ tiah do tàm nam 2020, lơh bơnàng jă ai broă chồl pràn lơh jat broă rơndap lơh bal mpồl dê tàm tơngai bơh nam 2021 tus nam 2025, pơ gồp bơnah lơh geh broă rơndap lơh ASEAN nam 2025.

Cau mblàng K’Duẩn