Tàm do, uă kwang bàng gah lơh sơnơm neh đơs tus ală bơta gơkòl pal gờñ geh bơsong. Dùl tàm ală bơta gơkòp là broă lơyài tơm priă kham sơm kòp bơh sră sền gàr gah lơh sơnơm dê uă rơlao mờ kờp dŭ lài. Ồng Nguyễn Đăng Giáp, Kwang lam bồ Hìu sơnơm dờng tơrgùm bal tiah Tây Nguyên pà git, hìu sơnơm neh uă rơlao mờ khà kờp dŭ lài rơlao 54 tơmàm đong, mơya tus tŭ do ờ hềt geh tơm wơl, lơh gơtìp uă kal ke. Ồng dan pal tam gơl broă lơh ha là ai càn ing lài.

Bơdìh hơ̆ tai, geh uă jơnau đơs tơlik nùs nhơm kơlôi rơcang bè broă rơndăp tăp sèng sàh, kơnhoàl lơh gơrềng tus mờ broă lơh bơh gah lơh sơnơm tàm ală sàh dê, tàm hơ̆ uă ngan là hìu sơnơm sàh tiah ngài. Cau tĕ khà dan pal geh tơngai bal mờ gùng dà broă lơh di pal jăt bơta krơi is bơh tơl tiah dê. Ală jơnau đơs kung neh đơs tus bơta kal ke tàm broă blơi sơnơm, ờ tơl pràn broă lơh adăt boh lam, broă dong kờl ờ uă mờ bơta yal phan sa tơnpràn să tìs mùl màl geh uă. Mpồl cau ala măt Quốk hội càr hơ geh tơrgùm wơl mờ yal tus kwang bàng, gah lơh sơnơm tàm pơrjum Quốk hội tus do.