Kơnòm dềt kòp là sau Rơ Châm H’Niê (deh nam 2020) ơm tàm ƀòn Hreng, sàh Hòa Phú, kơnhoàl Chư Păh, càr Gia Lai. Jat lùp sền bơta gơ rềng bơ tờp kòp, kơnòm dềt kòp ờ hềt cit vaccine kơryan kòp rang. Tàm pơgap 3 poh lài mờ tŭ gơbàn kòp, sau H’Niê ờ lik lòt bơh ƀòn ơm kis, mìng ơm rềp mờ cau pròc mhàm tờm tàm hìu mờ ală bơyô tàm ơdŭ bơsram. Oh klau kơnòm dềt kòp dê kung geh tềl tơnggŏ kòp dùl tŭ bal mờ gam geh sơm kòp mờ cồng nha kham kòp là duh să gơlik toh tài bơh kòp rang.

Tơnơ̆ tŭ cau kòp chơt să geh yal, gah lơh sơnơm càr Gia Lai neh lam lơh ƀồm sơnơm lơh kloh khuẩn tàm tiah mờ oh dềt kòp ơm kis, mờ kung sơlơ tơnguh tai mblàng yal, hòi jà làng bol lam kơnòm dềt tàm sơnam lòt cit vaccine wil tơl nàng rơcang lài kơryan kòp rang, tơrmù ƀà jơnau pơhìn bơtờp uă tàm mpồl bơtiàn. Kờp tus tŭ do, càr Gia Lai neh geh rlau 2 rbô 500 nă cau duh să gơlik toh pơrhê pin tài kòp rang mờ 217 nă cau bơtờp mờ kòp rang bơh xét nghiệm.