Pràn kơldang là bơta geh kwơmàng ngan rlau jơh bơh tơl nă kòn bơnus dê là bơnàng jă kwơmàng ai bơta bơtàu tơngguh kơnhăp jŏ dà lơgar dê. Tàm bơta pa mờ uă bơta lòng bè kòp bơtờp, khà kờp làng bol ngai sơlơ kra, ƀơ̆ ƀơl tiah ơm kis mờ tam gơl broă mờng ơm kis, broă tơngguh uă bơta niam drơng gàr pràn kơldang Làng bol in gơgơs kơnòl broă kờñ ngan jal mhar ngan. Jơnau lơh nền tàm pơrjum sồ 72 Ƀộ Cíñ trị dê ngai 9/9/2025 bè “Bàr pe broă lơh bơsong tam gơl pràn, sơlơ sền gàr, drơng gàr mờ tơnguh uă pràn kơldang Làng bol in” tơlik măt hơ̆ ngan là broă lơh jŏ jòng, tơnggŏ bơta wèt sền jŏ tơngai mờ jơh nùs lơh ngan pràn kơldang Đảng dê tàm broă lơh sơnơm.

Tàm tơngai bơh nam 2026- 2030, Jơnau lơh nền tàm pơrjum sồ 72 ai tơlik jơnau kờñ broă tờm kwơmàng là bơ̆t bơtàu ală anih lơh sơnơm ndrờm bal, niam, cồng nha mờ mŭt gơrờm bal, gàr tơl nă làng bol ndrờm geh tus bal drơng broă sa priă drơng gàr pràn kơldang kờñ ngan pal geh mờ priă tă dipal, mùl màl:

- Tơngguh uă pràn jak să jan, pràn jak bồ tơngoh, să bồ mờ sơnam kis jŏ pràn kơldang bơh làng bol dê. Tus nam 2030, tơnguh bơta jơnhoa kờp bal bơh kòn dềt dê mờ ơruh pơnu kơnòm pa tàu bơh 1 tus 18 sơnam gơguh tai êt ngan rlau jơh là bơh 1,5cm; sơnam kis jŏ kờp bal geh 75,5 sơnam, tàm hơ̆ khà nam kis pràn kơldang geh êt ngan rlau jơh là 68 sơnam.

- Tơrmù àñ ơnòng kơn jơ̆ kòp tê jê să mờ sok sền ală jơnau gơ pơhìn lơh gơrềng tus pràn kơldang. Khà cĭt rơcăng ală vaccine tàm Broă lơh cĭt rơcăng kờñ pal geh ngan geh hơđăng 95%. Khà làng bol sùm tus bal lơh broă tàp pràn să jan gơguh tai 10%. Sơlơ sok sền ală jơnau pơhìn gơrềng tus pràn kơldang, bè: ơlak, ƀièr, iù jràu, bơh tiah ơm kis ù, dà, nhơm trồ…

- Làng bol geh tus bal drơng broă sa priă lơh sơnơm geh niam, wèt tus drơng gàr pràn kơldang tơl làm.

- Bơh nam 2026, làng bol geh kham pràn kơldang ờs mờng pah dơ̆ halà kham săc rwah ờ sa priă êt ngan rlau jơh là pah nam dùl dơ̆, geh lơh sră pràn kơldang điện tử nàng gĭt pràn kơldang jăt sơnam kis, rơhời tơrmù àñ ơnòng kơn jơ̆ priă tă lơh sơnơm. Tus nam 2030, làng bol geh ờ sa priă piam kòp tàm khà pal geh tàm bơnah gơnoar kwơ kham sơm kòp ờ sa priă jăt tŭ tơngai.

- 100% hìu sơnơm kâp sàh geh bơcri priă phan bơna, phan ngui măy mŏk lơh sơnơm, cau lơh broă jăt gơnoar broă, kơnòl broă; tus nam 2027 geh êt ngan rlau jơh bơh 4 tus 5 nă ƀak sìh. Tơngguh khà kham kòp, sơm kòp mờ sră kham sơm kòp ờ sa priă tàm hìu sơnơm kâp sàh gơguh tus hơđăng 20%.

- Tus nam 2026, khà blơi sră kham sơm kòp ờ sa priă geh hơđăng 95% khà kờp làng bol, tus nam 2030 geh khà blơi sră kham sơm kòp ờ sa priă jơh gùt làng bol; bơtàu tơngguh ală broă lơh sền gàr rềs àr pràn kơldang.

Bơta wèt sền tus nam 2045:

- Pơnđơl tiah ơm kis geh bơta niam; ală sơñio khà pràn kơldang làng bol dê, sơñio khà geh drơng broă sa priă drơng gàr pràn kơldang kờñ pal geh ndrờm pal ală lơgar bơtàu tơngguh tàm kơnhoàl ù tiah do mờ tàm dunia.

- Làng bol geh sơnam kis jŏ kờp bal geh hơđăng 80%, tàm hơ̆ khà nam kis pràn kơldang gơguh tus hơđăng 71 sơnam, să bồ, bơta pràn kơldang să jan, bơta jơnhoa kờp bal bơh ơruh pơnu dê ndrờm pal mờ ală dà lơgar geh bal khà bơtàu tơngguh.

- Ală anih lơh sơnơm pa ngan, ndrờm bal, geh cồng nha, kơnhăp jŏ, ai rơcăng kòp lơh ai lài khà dùl, lơh geh jơnau kờñ sền gàr pràn kơldang ngan sơlơ uă mờ rơ̆ ru bơh làng bol dê.

Nàng lơh geh ală jơnau kờñ hơđăng, Jơnau lơh nền tàm pơrjum sồ 72 sồr lơh ală kơnòl broă, broă lơh bơsong gơcèng bơta tam gơl pràn, geh:

1. Tam gơl pa pràn kơldang bồ tơngoh kơlôi sơnơng mờ lơh broă tàm đơng lam, sồr lơh, lam lơh jăt broă lơh sền gàr, drơng gàr mờ tơngguh uă pràn kơldang làng bol in.

2. Di tŭ lơh gơs adăt boh lam, tơrgùm tơngguh uă pràn jak ală anih lơh sơnơm, ngan là lơh sơnơm rơcăng gàr lài, lơh sơnơm kâp hơđơm, ngui niam bơta pràn lơh sơnơm yô yau dê.

3. Tơngguh uă nùs nhơm lơh sơnơm, bơtàu tơngguh cau lơh broă lơh sơnơm niam, ndrờm bal, lơh geh bơta di nùs cau kòp dê mờ mŭt gơrờm bal mờ ală lơgar.

4. Lơh pràn lơh tam gơl pa priă jền lơh sơnơm mờ bơtàu tơngguh cồng nha, kơnhăp jŏ gùng dà broă lơh kham sơm kòp ờ sa priă.

5. Tam gơl pràn bơtàu tơngguh jak chài, măy mŏk, tam gơl pa bơceh lơh mờ tam gơl sồ tơl làm tàm drơng gàr pràn kơldang.

6. Lơh pràn bơtàu tơngguh lơh sơnơm làng bol dê lơh is, hòi tơrgùm mờ ngui geh cồng nha tơl priă jền ai bơtàu tơngguh lơh sơnơm in.

Jơnau lơh nền tàm pơrjum sồ 72 geh gơtha is ồn kwơmàng tàm broă rơndăp lơh jŏ jòng bơtàu tơngguh dà lơgar. Dùl dà lơgar mìng gơtùi bơtàu tơngguh kơnhăp jŏ tŭ làng bol pràn kơldang. Bơcri priă ai lơh sơnơm in ngan là bơcri priă ai tơnơ̆ do in, ai mpồl cau lơh broă in- jơnau tờm kwơmàng bơh gơguh lơh sa dê mờ gơguh jak mpồl bơtiàn.

Jơnau lơh nền tàm pơrjum ờ mìng bơsong ală bơta gam gơkòl, ờ hềt dipal bơh ală anih lơh sơnơm tŭ do dê lơm mờ gam lơh gơlik geh ală tam gơl pràn bè bồ tơngoh kơlôi sơnơng mờ lơh broă. Broă tam gơl pràn bơh “sơm kòp” tus “drơng gàr pràn kơldang tơl làm”, bơh rơmơ̆p ndơl tus rơcăng lài, bơh sơm kòp tus rơcăng gàr lài là broă gơguh kwơmàng, dipal mờ gùng dà bơtàu tơngguh bơh dunia dê.

Mờ, Jơnau lơh nền tàm pơrjum sồ 72 kung pơgồp bơnah lơh kơ̆ kơl jăp bơta pin dờn Làng bol dê tàm ală anih lơh sơnơm, tơngguh uă bơta niam rài kis mờ sơñio khà gơboh gơbài dà lơgar dê. Do kung là jơnau kwơmàng dong Việt Nam tơngguh uă pràn jak tàm pơrlòng mờ bơngă tàm muh măt ală lơgar.