Tàm cơldŭ ơm wơl kham sồ 2, ƀák sìh Võ Hồng Khắc, Gah Sơm kòp ờ ngui sơnơm lơh pràn wơl să jan, Hìu sơnơm sơnrang Dăk Lăk (sơnah ƀòn Thành Nhất, càr Dăk Lăk) kham sền, pơlam mờ cih sơnơm cau kòp in. Ƀák sìh Khắc pà git, sơm cau kòp sơnrang in ờ gơtùi jat tàm jơnau pơlam mùl màl mờ mìng gơtùi jat tàm mờng chài, tŭ tơngai jat sền jŏ jòng, jơnau pơhìn gơtìp aniai sùm mpờl gŏ: “Tŭ sơm kòp den sồr bol hi pal jat sền nền nòn cau kòp, mut tàm tơl cơldŭ nàng kham sền. 8 jơ drim pah ngai, bol hi pal tus tơl cơldŭ kòp nàng kham sền, sền khi neh sa drim, neh hùc sơnơm halà ờ hềt, gam sền gŏ ală bơta ờ geh ngan halà bồ tơngoh kah gơ tam gơl bè lơi. Tàm tŭ kham sền, uă cau kòp ờ đal git broă lơh să tờm dê den tàng digơlan rơp lơh bol hi khat tàm tŭ lơi”.

Ơm ngài Gah sơm kòp ờ ngui sơnơm Lơh pràn wơl să jan mờr 50 thơk, bơnah hìu kơ̆ kơljap ngan geh pơng gàr gùt dar mờ lòs là Anih piam sơm kòp cau kòp cau klau bơh Hìu sơnơm sơnrang càr Dăk Lăk dê. Tàm dơlam pơng gàr, điều zưỡng Phan Đình Tài gam đo huyết áp mờ dong kờl dùl nă cau kòp hùc sơnơm di khà. Tềng pơnì bi dê kung gam tềl nàl tài cau kòp kap tàm nam lài: “Ngai 04/8/2025, tŭ añ mut đo huyết áp dùl nă cau kòp là cau klau in, nisơna khai jàñ ngan, brồ kap añ tềng pơnì, chè sèt jơh àu mpha tai. Añ kung rơngòt ngan sơl. Tơnơ̆ tŭ neh ờ gam jàñ tai, bal mờ tơl nă cau kơryan cau kòp, añ lòt soh phan ndai, ràu jùt tềl sồt, ơm rlô dùl thoa den wơl rê wơl pơn jat tai lơh broă he dê”.

Rlau 2 nam sơm tàm Gah sơm kòp ờ ngui sơnơm Lơh pràn wơl să jan, Hìu sơnơm sơnrang càr Dăk Lăk, bi Nguyễn Văn Tôn ơm tàm sàh Dray Bhăng, càr Dăk Lăk geh ƀák sìh Khắc mờ bi Tài cau sền gàr cau kòp jơh nùs sền gròi pah ngai. Bi ngir ơlak, bồ tơngoh ờ gam kah tai, geh ală tŭ gam ờ git broă he lơh. Bi ờ kah là neh git nđờ dơ̆ ală ƀák sìh, điều zưỡng pal bòl glar ngan nàng gàr bi geh ờdo ờdă. Bi Tôn đơs là, dilah ờ geh bơta toh glài mờ nùs nhơm lơh sơnơm niam khi dê, digơlan tŭ do bi ờ git là să tờm bi neh gơbàn bè lơi. Tàm bơta chờ hờp kòp jê rơhời gơmù, rơcang geh lik bơh hìu sơnơm, bi Tôn ngoh rơngac đơs: “Añ gŏ mpồl y, ƀák sìh tàm hìu sơnơm jơh nùs ngan; tàm hơ̆ ƀák sìh Khắc mờ điều zưỡng Tài sùm sền gròi kham sền, gròi sền wil tơl ngan mờ pơn jờng să tờm añ. Añ kơp kờñ là he gơtùi tơn jơh ngir ơlak, bồ tơngoh kah wơl nàng mhar rê mờ hìu bơnhă”.

Hìu sơnơm sơnrang càr Dăk Lăk geh tơng gơs nam 2008, geh 100 nơm jơ nờng, sơm piam wơl tàm hìu sơnơm ai 100 nă cau kòp in. Nam 2025, bơdìh mờ rlau 20 rbô dơ̆ cau geh kham, hìu sơnơm gam gròi sền 17 rbô nă cau geh tềl tơnggŏ ală kòp sơnrang, trầm kảm mờ gơ pơt să ờ kah rơngac, jat broă lơh jơnau kờñ Dà lơgar bè lơh sơnơm. Uă cau kòp neh bời, rê wơl mờ hìu bơnhă kơnờm bơta lơh ngan bơh mpồl y, ƀák sìh, cau lơh broă dê. Bulah bè hơ̆, tài bơta krơi is, hìu sơnơm kung gam gơtìp uă kal ke bè cau lơh broă, bơta dong kờl mờ bơta ờ rờm bơh mpồl bơtiàn dê. Ƀák sìh Nguyễn Thị Luyến, Phó Kwang lam bồ hìu sơnơm dan bàr pe broă lơh nàng tơnguh cồng nha kham, sơm kòp tàm tơngai tus: “Tŭ do, Anih duh broă Làng bol càr Dăk Lăk geh bơta dong kờl gơ hòi gơ jà cau lơh broă mìng ngui gơ wèt mờ ƀák sìh, mờ khà dong kờl tai 5% priă nhai pah nhai; tàm tŭ ală cau ndai bè điều zưỡng, cau drơng măi den ờ hềt geh dờp bơta dong kờl. Tàm hìu sơnơm sơnrang, jat añ den bơta lơh broă kal ke, bòl glar là ndrờm bal, bè hơ̆ den tàng hìu sơnơm dan Anih duh broă Làng bol càr tam gơl gùng dà broă lơh dong kờl ai điều zưỡng, cau drơng măi mờ cau lơh broă in, ndrờm geh dờp bơta dong kờl. Bơh hơ̆, pơn jờng khi iang nùs đềt mềr mờ broă lơh, mờ hìu sơnơm, pơn jat tai gròi sền mờ sơm cau kòp in”.

Pah ngai lòt gan, mpồl y, ƀák sìh mờ cau lơh broă tàm Hìu sơnơm sơnrang càr Dăk Lăk kung gam ngềt ngơt lòt gan ală dơ̆ lơh broă uă bơta kơn jơ̆, pơhìn uă bơta aniai gơtìp cau kòp ờ đal git broă lơh he dê lơh pờng. Bulah bè hơ̆, mờ kơnòl bal mờ bơta jơh nùs bơh cau lơh sơnơm dê, khi kung gam kơ̆ dơn lơh broă, jơh nùs gròi sền, sơm kòp nàng uă cau kòp in rơhời pràn wơl, bồ tơngoh kah wơl mờ rê wơl mờ hìu bơnhă, ƀòn lơgar.