VOV4.K’ho – Tàm dơ\ pơrjum dờng màng ASEAN dơ\ 35 mờ ală pơrjum geh gơ rềng, drim ngai 4/11, tàm càr lơgar Bangkok, lơgar Thái Lan, Thủ tướng Nguyễn Xuân Phúc neh tus bal pơrjum dờng màng ASEAN+3 (geh Nhờk, Lo mờ Hàn Quốc) dơ\ 22. Đơs tàm pơrjum, Thủ tướng đơs là tàm tu\ tơngai ală broă tàm dunia mờ tàm ală lơgar rềp bal gơlik geh kal ke, ală lơgar ASEAN+3 kung ơm tềng đap ua\ bơta lòng, den tàng pal sơlơ lơh broă bal nàng sền gàr mờ chồl pràn lơh broă bal ua\ lơgar, khat gơboh kă bro, tam klac mờ tơnguh pràn jak brồ guh is tềng đap ală bơta gơ rềng bơh đah bơdìh.

Thủ tướng Nguyễn Xuân Phúc tus bal pơrjum ASEAN+3

Thủ tướng sồr chồl pràn lơh broă bal tàm gah lơh sa – pria\ jền; tơnguh pràn jak ai Văn phòng kơlôi sơnơng broă lơh sa dờng (AMRO) in nàng ai tơlik ală jơnau đơs bè broă lơh kuơmàng. Thủ tướng đơs, lơh broă bal là kuơmàng ngan tàm bơtàu tơnguh kơ\ kơljap, den tàng pal tơr gùm jơh bơta pràn, ngan là tơrbo\ bal phan bơna, tam klac số, bơtàu tơnguh lơh sa số, kă bro điện tử, bơt bơtàu [òn dờng ngac ngar. Thủ tướng kung đơs nền bơta kuơmàng bơh broă tam klac bal làng bol, tàm hơ\ Việt Nam geh ua\ tă pơgồp, pơgồp bơnah chồl pràn git gơp đềt mềr, git wă bal mờ gơp đah ală rơnàng làng bol tàm tiah do.

Cau mblàng K’Duẩn