VOV4.K’ho - Drim òr (22/12), tàm hìu lơh broă Chính phủ, Thủ tướng ồng Nguyễn Xuân Phúc tìp măt ală cau pơrlòng tàp pràn să jan geh cồng nha jăk ngan tàm Sea Games 30, chờ gờm mờ pơn jờng ală cồng nha jăk chài neh pơrlòng geh.

Đơs tàm dơ\ tìp măt, Thủ tướng ồng Nguyễn Xuân Phúc đơs, jơh ală gai lòng mờ tơl mpồl, cau dùl nă să neh pơrlòng geh ndrờm kuơ màng, ndrờm là bơta pràn, dà kơl hề, dà măt hơ\ sồng pơrlòng geh.

Thủ tướng sồr ală cau tàp pràn să jan, pha ờ pơnhừ să, ờ jai ờ dil kờ` pơn jăt tai bơsram tàp, geh cồng nha uă tàm tơngai tus. Tàm hơ\ là tu\ nam 2021, lơgar Việt Nam geh dờp là lơgar tòm bơyai lơh pơrlòng Sea Games dơ\ 31, ală cồng nha uă pal pơn jăt tai geh sùm mờ geh cồng nha uă rơlao tai.

Tàm dơ\ tìp măt, ala măt Đàng, Dà lơgar, Thủ tướng ồng Nguyễn Xuân Phúc neh jào 2 huân chương Lao động khà 1 ai mpồl tàp pràn să jan lơgar Việt Nam in mờ cau pơrlòng tàp pràn să jan Nguyễn Thị Ánh Viên; jào 3 Huân chương Lao động khà 2 ai mpồl coh plai cau ùr dà lơgar mờ mpồl coh plai cau klao U22 Việt Nam; ồng Mai Đức Chung, atbồ mpồl coh plau cau ùr dà lơgar in.

Cau mblàng Ndong Brawl