Broă lơh lòt lùp sền geh lơh bơh ngai 01 tus ngai 04/04, mờ bơta tus bal bơh ală mpồl lơh sa kă bro lơh broă lòt nhơl, anih lơh broă mblàng yal jơnau, sră ƀăo mờ ală cau gĭt wă jrô, cau tiơng pơnrơ, cau tề lam jơnau đơs mpồl bơtiàn dê tàm broă lòt nhơl tàm dơlam mờ bơdìh lơgar tus bal. Mpồl neh lòt sền gŏ tơn uă anih tus, phan bơna lòt nhơl mùl gŏ is gơ jăt bal mờ niam chài, brê bơnơm geh is mờ phan lời wơl càr Dăk Lăk dê, bơh hơ̆ đơs bơta niam drơng broă sa priă, phan bơna bơ̆t bơtàu mờ jơnau tơl pràn jòi tour, dơ̆ lòt nhơl. Uă jơnau đơs đơs là, nàng lơh geh cồng nha bơta pràn, Dăk Lăk pal pơn jăt tai lơh sir phan bơna bơ̆t bơtàu, tơngguh uă bơta niam drơng broă sa priă, bơtàu tơngguh ală phan bơna mùl gŏ is gơcèng bơta tơrbŏ bal ală tiah, mơkung lơh pràn tam gơl sồ tàm yal uă, ătbồ lòt nhơl.

Ồng Trần Hữu Phước, Kwang Lam bồ Kông ty THP Travel Tour & Caravan Center, tàm càr Quảng Trị đơs là:

“Tŭ do, ală gơl gùng tàm tơrbŏ đah dơng bơnơm Tây Nguyên mờ ală càr kềng gah dà lềng đah jum tàm gùl lơgar gam ờ niam. Añ sơnơng là pal rơndăp ù tiah mờ bơtàu tơngguh gùng lòt pràn kơldang. Dilah mờ lơh geh gơl gùng do den jăt añ den là ală mpồl caravan tàm tơrbŏ Dăk Lăk, ală càr dơng bơnơm Tây Nguyên mờ ală càr kềng gah dà lềng đah jum tàm gùl lơgar, geh bal tus Đà Nẵng mờ Quảng Trị lơh gơs dùl phan bơna lơh bal niam ngan tàm broă lơh lòt nhơl Caravan”.

Uă cau ala măt kung đơs là, Dăk Lăk kờñ pal jòi lơh ală bơta pràn bơta ƀươn neh geh lài nàng lơh ală phan bơna lòt nhơl pa, ngan là phan bơna geh bơta is, phan bơna bè trồ mang nàng tơngguh tŭ jiơ lòt sền, ơm bĭc tàm ƀòn lơgar. Bơdìh hơ̆ tai, Dăk Lăk pal sơlơ lơh bal yal uă mờ hòi jà lòt nhơl tàm dơlam mờ bơdìh lơgar, lơh geh anih tờm nàng gơhòi gơ jà năc ală lơgar tus mờ ƀòn lơgar.

Jăt Sờh Niam chài, Tàp pràn să jan mờ Lòt nhơl càr Dăk Lăk, tơnơ̆ tŭ rề ơnàng ù tiah bơtàu tơngguh, lòt nhơl ƀòn lơgar geh uă bơta nàng lơh gơs ală phan bơna lơh bal đah kơnhoàl ù tiah brê bơnơm dờng mờ kềng gah dà lềng. Is qúy I nam 2026, jơh gùt càr wă pơgăp 2 tơlak 300 rbô nă năc, priă geh bơh kă bro lòt nhơl geh rlau 4 rbô 100 tơmàn đong, pơn jăt tai gàr khà gơguh tai niam ngan.

Ồng Lê Phúc Long, Phó Kwang Lam bồ Sờh Niam chài, Tàp pràn să jan mờ Lòt nhơl càr Dăk Lăk pà gĭt, càr pơlam gùng ai lòt nhơl gơgơs gah lơh sa tờm, rơhời bơ̆t bơtàu măt kă bro “Dăk Lăk – Rê ƀòn phan lời wơl” gơgơs anih tus lơh gơkờñ ngan bơh năc lòt nhơl tàm dơlam mờ bơdìh lơgar dê.

“Pơrjum dờng dơ̆ do rơ̆p dong gah niam chài, tàp pràn să jan mờ lòt nhơl uă ngan tơngume, bơh kơrnoăt boh lam gùng dà broă lơh, bơtàu tơngguh phan bơna lòt nhơl, pơlam gùng mblàng yal jơnau, yal uă, hòi jà mờ is ồn là lơh bơta lơi nàng gơhòi gơ jà geh năc lòt nhơl tus mờ Dăk Lăk, ngui jơh geh phan kwơ geh is mờ mùl màl tŭ do Dăk Lăk dê”.