Tơnơ̆ tŭ tơmut bal, càr Dăk Lăk geh dùl ù tiah lòt nhơl krơi is – tiah mờ brê bơnơm dờng ơning ơnàng Tây Nguyên gơ tàm tìp mờ ù tiah kềng gah dà lềng. Tàm hơ̆, tiah brê bơnơm dờng ơning ơnàng Tây Nguyên là rùp pơrya ai bơta pràn kis kơ̆ dơn, bơta tơrgùm niam ngan bơh niam chài bơh yau ală jơi bơtiàn dê, den ù tiah kềng gah dà lềng đah mat tơngai mut là bơta duh hồl, gơ bơrlŭ bal bơh jơh bal dà lềng mờ dà lềng dờng dê. Pal sền gròi là bơh tiah kơh bơnơm dờng ơning ơnàng mù tus tiah kềng gah dà lềng bơh càr Dăk Lăk dê ndrờm geh bal bơnàng jă ù bơnơm ồs – bazan krơi is, gơ bơrlŭ bal ù tiah niam chài cing mồng mờ đơs ƀài chòi tiah đah jum tàm gùl lơgar. Tơngai lài, tàm Dăk Lăk neh geh lơh uă broă lơh lòt nhơl bè: lam lơh mpồl famtrip lòt sền lòt nhơl bal mờ lam lòt nhơl, sră ƀău, KOLs, KOCs; Pơrjum sền sơ wì cồng nha gùng lòt nhơl “Dăk Lăk – Rê hờ tiah phan lời wơl”, bơyai lơh Drà kă bro phan – lòt nhơl, OCOP mờ phan bơkah tiơng pơn rơ ƀòn lơgar dê; gùng đơs crih – DJ – lơh lèu gơ dan ñŏ drơng nac lòt nhơl in.

Ồng Lê Phúc Long – Phó Kwang lam bồ Sờh Niam chài, Tàp pràn să jan mờ Lòt nhơl càr Dăk Lăk yal:

“Nac lòt nhơl tŭ tus mờ tiah đah mat tơngai mut Dăk Lăk den git nền là rơp geh sền niam chài cing mồng mờ bol hi rơp geh ală phan lòt nhơl sền git ngan ngồn mờ mòn cing, dròng cing jañ mồng, sền lơh niam wơl cing. Ai gơ wèt mờ tiah đah mat tơngai lik den geh ƀài chòi, den bol he gơtùi lơh ală tour sền đơs ƀài chòi. Bè hơ̆ den bol he rơp ai nac lòt nhơl in sền git, geh đơs pơnđik, geh soh phan kòn cau, ngui ală phan bơna, ală đờng goòng bơh yau bơh làng bol kòn cau dê, bơh hơ̆ rơp gơ hòi gơ jà nac lòt nhơl”.

Bơh poh sơn rờp mut lơh ală broă lơh lòt nhơl càr Dăk Lăk nam 2026, làng bol mờ nac lòt nhơl neh geh tơmut să jan he tàm broă lơh đơs crih tamya niam krơi is ngan. Ồng Cao Hữu Nhạc ơm tàm sơnah ƀòn Tuy Hòa, càr Dăk Lăk ai tơnggŏ bơta pin dờn bè bơta kơp kơnờm bơtàu tơnguh lòt nhơl ƀòn lơgar dê:

“Gơ lơh niam nùs ngan bè dồ ròt ală broă lơh đơs crih tamya geh lơh sùm bơh Tây Nguyên dờng ơning ơnàng tus tiah kềng gah dà lềng, đơs tus dùl bơta tŭ tơmut bal den rơp geh ală bơta ƀuơn krơi is. Do là tŭ niam lơh gơlik he in, tàm tơrbŏ bal đah ală tiah, is ồn là tơrbŏ bal đah Tây Nguyên mờ tiah kềng gah dà lềng, rơp là dùl bơta ƀuơn ai bơtàu tơnguh lòt nhơl in”.

Jat Sờh niam chài, Tàp pràn să jan mờ Lòt nhơl càr Dăk Lăk, tơnơ̆ tŭ rề ơnàng ù tiah bơtàu tơnguh, lòt nhơl càr dê geh uă bơta ƀuơn nàng lơh gơs ală phan bơna tơrbŏ bal đah tiah kơh bơnơm mờ tiah kềng gah dà lềng. Do là bơnàng jă kuơmàng nàng lơh gơlik bơta li la broă sền git, tơnguh bơta pràn tàm pơrlòng bơh anih tus dê. Nam 2025, Dăk Lăk wă rlau 7 tơlak 300 rbô dơ̆ nac, gơguh rlau 31% pơndrờm dùl tŭ bal mờ nam lài hơ̆. Is ồn, 3 nhai bồ nam 2026, gùt càr wă mờr 2 tơlak 300 rbô dơ̆ nac, priă lơh geh bơh lòt nhơl geh rlau 4 rbô 100 tơmàn đong, pơn jat tai gàr sùm khà gơguh niam ngan.

Càr ai tơlik lài gùng dà lam lòt nhơl gơ gơs gah lơh sa tờm, rơhời bơt bơtàu mat sơnđan “Dăk Lăk – Rê hờ tiah phan lời wơl” gơ gơs anih tus gơ kờñ ngan bơh nac lòt nhơl tàm lơgar mờ bơdìh lơgar dê. Bơh sap cing mpong ntas tiah kơh bơnơm tus gùng đơs ƀài chòi hô hơng tiah kềng gah dà lềng, pang rùp Dăk Lăk mpờl gŏ bềng lìu bơta gơ klŏ gơ crà, niam ngan mờ gơ hòi gơ jà ngan. Bơta tàm bơrlŭ hơ̆ gam lơh gơlik bơta gơ hòi gơ jà krơi is, hòi jà nac lòt nhơl tus sền, jòi git mờ sền gŏ wil tơl dùl ù tiah bềng lìu bơta niam chài, bềng lìu bơta pràn kis.