Tàm pơrjum bơyai, ală cau chài cùp rùp tam pà bal bè gùng lòt tus mờ cùp rùp mờ bơta bơtoah ngan đềt mềr mờ tơngume niam chài ală jơi bơtiàn dê. Uă jơnau đơs đơs là, ngan là bơta li la bè rài kis, bơhiàn yau mờ bơta jrô niam chài dê neh lơh geh bơta gơ kờñ kơ̆ wền ai cau ià măi cùp rùp in.

Jat cau chài cùp rùp Nguyễn Xuân Chính, ơm tàm Hà Nội, nàng geh ală rùp cèng bềng bơta kwơ niam, cau chài cùp rùp pal lời tŭ tơngai jòi gĭt, kis bal mờ cau geh cùp mờ sền dờng màng bơta kwơ niam chài bơh tơl jơi bơtiàn, tơl kơnhoàl ù tiah dê:

 “Do là dùl tơngume kal ke ngan, kal ke ngan cùp. Mờ lài mờ tŭ cùp den añ pal jòi gĭt lài, pal sền nền nàng wă rlau tai bơhiàn rài kis bơh làng bol jơi bơtiàn hơ̆ dê nàng lơh bè lơi tŭ mờ tus rềp mờ bơceh lơh, jòi gĭt rlau tai bè kòn bơnus, nàng lơh bè lơi rơ̆p jờng rơ geh bơta kwơ bơh tơl jơi bơtiàn dê”.

Ală cau chài cùp rùp kung đơs ală bơta kal ke tàm tŭ ntrờn lòt tus tiah sar lơgar ngài; bơta kơryan bè jơnau đơs, halà broă tus mờ cau he kờñ cùp rùp. Mơya, ngan ală bơta lòng do den sồr cau chài cùp rùp pal kơ̆ nùs, ngăc ngar mờ geh kơnòl rlau mờ tơl nơm rùp geh cùp bơh he dê.

Bơh bơta geh ngan tàm tŭ bơceh lơh, ală cau chài cùp rùp jòi gĭt jrô ngan tàm jơnau niam chài, rài kis, bơh hơ̆ pơgồp bơnah lơh gơrề uă bơta kwơ bơhiàn niam chài is ală jơi bơtiàn tàm rài kis pa tŭ do dê; pờ tơlik tai ală gùng lòt pa tàm tŭ jòi gĭt bơceh rùp cùp.

Cau chài cùp rùp ồng Vũ Duy Thương, ơm tàm sơnah ƀòn Tân Lập, càr Dăk Lăk pà gĭt:

“Bơh ală jơnau đơs hơ̆ den neh pơlam ai he in tŭ bơceh lơh lơh bè lơi nàng ờ hoan hoàc huơr ir, lòt jrô tàm bơta niam chài, bơta kah yau, bơta geh ngan, ndrờm bè ală jơnau đơs neh đơs dê, bol he ờ gŏ di lơh tìs mờ bơta geh ngan, lơh ngan sền dờng màng bơta geh ngan dê, sền gàr bơhiàn niam chài is mơya pal là bơta ngan, bơta hơ̆ ngan là bơta kwơ màng ngan. Hơ̆ là bơta mờ pơlam gùng dà ai ală cau lòt tơnơ̆ do in nàng khi in rơ̆p lơh sir rlau tai, niam rlau tai mờ ngui niam jơh ală bơta kwơ bơh cau chài cùp rùp dê, tơnguh gơnoar bơta niam dê lòt guh hơ đăp”.