Ală ngai bồ nam pa, ƀòn lòt nhơl mpồl bơtiàn Njriêng, sàh Dăk Nia, ƀòn dờng Gia Nghĩa, càr Dăk Nông chờ hờp tàm ală săp ntas dròng cing lơh mpong sùm gùt brê bơnơm, chờ gờm cau năc tus nhơl sền ală bơta niam chài mờ sào sa phan bơkah krơi is tàm tiah do dê. Ồng K’ Biêng, cau chài dròng cing tàm ƀòn Njriêng pà git, broă càr rơwah ƀòn lơh ƀòn ơm rơlô bơh phan lời wơl Kông viên địa cất gùt plai ù mờ ai gùng dà broă lơh lòt nhơl mpồl bơtiàn neh geh pờ geh gùng dà bơtàu tơnguh lơh sa ai làng bol in. Bal mờ bơta niam chài cing mồng, ală broă lơh ờs mờng bơh làng bol dê bè tàñ ồi yau, ƀĕ tơrnờm, ha là ală broă lơh ơm bic tàm mpồl bơtiàn kung geh tơnguh lơh nàng drơng làng bol, cau năc tus nhơl sền in.

Làng bol tàm ƀòn Njriềng gam rơhời tơrgùm bal mờ rài bơtàu tơnguh lòt nhơl. “Bơta niam chài ờs mờng geh prăp gàr, lơh sa geh ală gùng dà bơtàu tơnguh niam ngan, làng bol chờ hờp mờ pin dờn tàm broă đơng lam bồ bơh ală kấp ủy đảng, gơnoar atbồ. Añ pơn dờn nam pa mờ ală nam pơn jăt tai ƀòn lơgar ngai sơlơ bơtàu tơnguh. Di tàm nam pa, chờ gờm jơh làng bol kis tàm gùt lơgar sùm hờm ram mờ gơboh gơbài, lơh sa geh uă cồng nha”.

Nhai 7 nam 2020, Kông viên địa cất Dăk Nông geh UNESCO dờp là Kông viên địa cất gùt plai ù. Tus lồi nhai 12 nam 2024, Kông viên địa cất Dăk Nông dờp khà do dơ̆ bàr, tơngai lơh bơh nam 2024 tus 2027. Mờ bă ù ơnàng 4 rơbô 760 kơi sồ vuông, geh làm tus 6 kơnhoàl, ƀòn dờng, geh 65 tiah phan lời wơl ù tiah dê, tàm hơ̆ geh bal mờr 50 trồm rơgồng mờ jòng rơlao 10 rơbô thơ̆k, ală bơr bơnơm ồs, ñrùh dà… Kông viên địa cất Dăk Nông là tiah prăp gàr ală bơta kwơ krơi is bè uă bơta siñ họk, uă bơta niam bơnĕ bè niam chài, ù tiah, geh is kung bè bơta tềl tơngŏ lơh broă bơh cau rài lài dê.

Mò Nguyễn Thị Hà là cau kă bro, Phó Củ tịc Anih tờm kơlôi sơnơng bơtàu tơnguh mpồl lơh sa kă bro câu Á, Củ tịc lơh geh ală ƀòn brê bơnơm Eva Village, càr Dăk Nông pà git, mờ gùng dà bơtàu tơnguh “Tiah bơh ală Săp ntas”, Kông viên địa cất gùt plai ù UNESCO Dăk Nông neh ai tơngŏ bơngă tàm pang sră rùp ù tiah phan lời wơl gùt plai ù dê, pơgồp bal tàm broă jờng rơ ală bơta kwơ ù tiah, niam chài mờ bơta niam ù tiah brê bơnơm krơi is bơh ù tiah Tây Nguyên dê. Jăt mò Nguyễn Thị Hà đơs, ală mpồl lơh sa kă bro lòt nhơl ơm rơlô să tàm càr, tàm lơgar mờ ală lơgar kung gam rơhời lơh geh ală bơta kwơ krơi is bơh Kông viên địa cất dê nàng bơtàu tơnguh kơ̆ kơl jăp. “Kông viên địa cất gùt plai ù den neh pơnrơ ngan bloh, neh pơnrơ tus tàm dunia, hơ̆ kung là dùl bơta tờm nàng he đòm jăt niam rơlao bè lòt nhơl. Cau năc ơm tus ờ mìng là ơm rơlô să, sền gròi tus mờ phan sa mờ cau gam sền gròi tus mờ ală jơnau yal yau geh tàm tiah do dê, ală dơ̆ lòt nhơl, gơl gùng trồm bơnơm ồs geh uă ngan cau năc sền gròi”.

Mò Lê Thị Hồng Vân, Lam bồ Vụ Cri bơyai broă mờ lơgar ndai Niam chài mờ UNESCO, Kwang gơnoar cih dờng Anih duh broă dà lơgar UNESCO Việt Nam, gơwèt Ƀộ Cri bơyai broă lơh bal mờ lơgar ndai pà git, broă geh dờp tai khà măt kwơ màng do là bơta tờm kwơ màng ngan. Bơta do ờ mìng dong kờl càr Dăk Nông tơnguh broă lơh jŏ jòng bơtàu tơnguh jăt broă tơtlòng lơh kơ̆ kơl jăp bơh Broă Pơrjum 2030 geh Liên Hợp Quốk ai. Tàm hơ̆, lam broă prăp gàr ù tiah geh is, rơcang sơndră mờ tam gơl trồ tiah, tơrmù ờ uă ngan rềs àr bơh trồ tiah lơh gơtìp, mờ lơh pràn broă bơtàu tơnguh lơh sa mpồl bơtiàn geh ai tàm bơta ndrờm bal mờ ù tiah geh is mờ bơta niam chài ờs mờng. “Ală bơta kwơ gùt plai ù, ală ù tiah niam geh is bơh càr Dăk Nông dê mờ gùng trồm rơgồng bơnơm ồs niam bơnĕ ngan tàm tiah đah jum măt tơngai lik câu Á dê. Mờ ù tiah geh is niam bal mờ rài lài do niam chài geh uă, pơgồp bal mờ ală bơta kwơ phan bơna mờ ờ di phan bơna mùl màl neh là bơta tơngŏ niam ngan ai broă prăp gàr mờ ngui phan lời wơl bơh dùl bă ù niam chài bơh ù tiah Tây Nguyên dê. Bè ală kwang đơng lam bồ UNESCO kung đơs, Kông viên địa cất gùt plai ù càr Dăk Nông dê mùl màl là rùp rài lam lài bơh broă prăp gàr, ngui bơta kwơ phan lời wơl ù tiah, drơng bơtàu tơnguh kơ̆ kơl jăp in”.

Ồng Hồ Văn Mười, Củ tịc Anih duh broă Làng bol càr Dăk Nông đơs nền, broă dờp khà măt Kông viên Địa cất gùt plai ù UNESCO Dăk Nông dơ̆ 2, pờ geh bơta niam pa ai càr in lơh pràn broă bơtàu tơnguh lơh sa mờ lơh broă bal mờ ală lơgar. Do kung là bơta tờm kwơ màng càr Dăk Nông dê tàm broă lơh jăt Jơnau lơh nền tàm pơrjum sồ 08 bơh Ƀộ Cíñ trị dê bè bơtàu tơnguh lòt nhơl gơs gah lơh sa tờm, lơh ală bơta geh uă bơh càr dê. “Càr Dăk Nông ai broă bơtàu tơnguh lòt nhơl tàm bơta tờm đòm jăt bơta kwơ geh is, ală bơta kwơ niam chài-krơi is niam bơnĕ bơh yau dê, Kông viên địa cất gùt plai ù UNESCO là dùl tàm pe bơta tờm bơh lơh sa càr dê. Càr neh lơh jăt nền nòn broă prăp gàr ù tiah niam, bơta kwơ ù tiah, niam chài, tàm hơ̆ is ồn bơyai lơh ală broă lơh yal tơngit, yal, bơto bơtê tiah kis, pơgồp bal lòt nhơl mờ lơh broă bal mờ ală lơgar, rơhời tơnguh uă bơngă bơh Kông viên địa cất gùt plai ù UNESCO tàm pang sră rùp ù tiah lòt nhơl tàm lơgar mờ ală lơgar dê”.

Mờ ù tiah geh is niam bơnĕ, bal mờ ală bơta kwơ niam chài krơi is, bal mờ broă prăp gàr jŏ jòng, ngui bơta kwơ phan lời wơl di pal, Kông viên địa cất gùt plai ù UNESCO gam rơhời pơgồp bal tàm broă bơtàu tơnguh mhar mờ kơ̆ kơl jăp càr Dăk Nông dê. Lơh sa lòt nhơl rơhời gơs gah lơh sa tờm, ờ mìng dong kờl lơh geh ală bơta geh, bơta pràn càr dê, lơh jăt di mờ gùng dà broă lơh bơh Dà lơgar, mờ gam pơgồp bal niam tàm broă lơh jăt jơh ală jơnau kờñ bơtàu tơnguh kơ̆ kơl jăp bơh Broă rơndăp lơh bơh Liên hợp quốk dê sồr.