Lài mờ nam pa 2025, tàm ƀòn kòn cau K’ Ho, thôn Klong Trao 1, sàh Gung Reh, kơnhoàl Di Linh, càr Lâm Đồng geh bơyai lơh ñô lir bong kòn cau K’ Ho (Sre) dê. Do là dùl tàm ală broă lơh ñô sa dờng ngan kòn cau K’ Ho kis tàm càr Lâm Đồng dê, geh lơh wơl nàng prăp gàr mờ ngui ală bơta niam chài jơi bơtiàn kis bơh yau tàm ƀòn do dê.

Bal mờ ală kra ƀòn, cau chài dròng cing tus bơh uă ƀòn bơh ală sàh Gung Reh, Tân Nghĩa, Bảo Thuận, Liên Đầm mờ rơlao 100 nă ùr ơruh klao pơnu kòn cau K’ Ho là ală cau tàm ală mpồl dròng cing kơnhoàl Di Linh dê neh tus bal lơh wơl broă lơh ñô lir bong. Oh Tambou Thùy, kòn cau K’ Ho, kis tàm thôn Klong Trao 1, sàh Gung Reh pà git, geh tus bal tamya, dròng cing tàm dơ̆ lơh chờ do là chờ hờp ngan. Do là broă lơh kwơ màng nàng oh bal mờ ală blơyô nrơh nrang pơn jăt tai bơsram, prăp gàr mờ ngui bơta kwơ niam chài krơi is làng bol dê. “Añ gŏ gơlơh chờ hờp mờ gơboh gơbài ngan tŭ tus bal dròng cing mồng tàm dơ̆ lơh wơl ñô lir bong kòn cau K’ Ho añ dê. tơnơ̆ do, añ kờñ oh kòn, kòn sao, ală cau gam kơnòm git tamya, git dròng ală jơnau cing, prăp gàr niam bơta niam chài jơi bơtiàn dê sùm nàng ală rơnàng tơnơ̆ do in”.

Jăt ồng K’ Keo, kis tàm thôn Hàng Làng, sàh Gung Reh, kơnhoàl Di Linh yal, ală nam do, Đảng mờ Dà lơgar sùm ai tơl bơta niam nàng bơta niam chài cing mồng geh prăp gàr mờ bơtàu tơnguh. Ờ mìng tàm ală ƀòn, cing mồng gam geh bơto tàm ală hìu bơsram tàm kơnhoàl dê. Kơnờm mờ hơ̆, ngai sơlơ geh uă cau gam kơnòm tus bal bơsram, dròng cing tàm ală mpồl. Broă bơyai lơh wơl ñô lir bong là dùl tàm ală broă lơh ngan bơh gơnoar atbồ ƀòn dê nàng bơto bơtê oh kòn kòn sao in git mờ prăp gàr, ngui niam bañ lờo roh. “Ñô lir bong là broă lơh ñô sa chờ ờs mờng geh bơh yau kòn cau K’ Ho dê. Tŭ do, broă lơh sa neh bơtàu tơnguh bloh, den tàng bal mờ gơnoar atbồ kơ̆p kờñ geh lơh wơl di bè ờs broă ñô sa chờ do, kơ̆p kờñ oh kòn kòn sao tơnơ̆ do tŭ bơyai lơh ñô lir bong geh lơh wơl niam nàng oh kòn kòn cau K’ Ho in wă rơlao tai bè bơta niam chài ờ mờng bơh jơi bơtiàn dê nàng prăp gàr mờ ngui niam”.

Bal mờ broă prăp gàr, ngui bơta kwơ niam krơi is cing mồng dê, kơnhoàl Di Linh, càr Lâm Đồng gam ai tơl bơta niam nàng ală mpồl dròng cing tàm ală ƀòn tus bal dròng, drơng broă lòt nhơl mpồl bơtiàn in. Do là dùl bơta broă lơh drơng ala lòt nhơl pa, pơgồp bal tàm broă lơh pràn lơh sa mpồl bơtiàn sàh dê bơtàu tơnguh jăt gùng dà broă lơh kơ̆ kơl jăp.