Bè ờs tơnơ̆ mờ tŭ geh bao, lik ơm is neh 5 nam, 10 nam ha là jŏ rơlao, jăt mờ bơta geh tàm rài kis bơh cau kòn neh tơl, den dan mờ mè bèp nàng bơyai lơh Yàng Kah ưn ngài nàng ưn ngài broă deh dùh, ròng siam. Broă bơyai lơh yàng kah ưn ngài jăt mờ rài kis broă lơh sa hìu nhă dê. Lài do cau pas den lơh yàng sa rơpu, sa kơnrồ… mơya tŭ do, jơh ală cau kòn cau Bơnhàr lơh yàng git jơnau mờ mè bèp sa sur; di lah oh mi tàm jơi nòi gal den lơh yàng sa sur dờng, gam di lah jơi nòi ờ gal den lơh yàng sa sur di mơ. Lài mờ tŭ bơyai lơh yàng, cau kòn pal rơcang ờ uă bơta phan bè: sur, iar, drăp tơrnờm nàng bơyai lơh yàng mờ ñô sa. Bơdìh hơ̆ tai, cau kòn pal rơcang tai ală phan kwơ ndai bè: Ồi, ào kòn cau, khŏ jĕp, jơrlŭ bơngàn nàng pà mè bèp, oh mi pròc mhàm in…

Ồng Guin kis tàm ƀòn Bla-Troéc, sàh Kơ Dang, kơnhoàl Đăk Đoa pà git: tŭ neh rơcang tơl ală bơta phan, cau kòn yal mờ mè bèp, rơwah ngan nhai niam nàng cèng ală bơta phan pà mè bèp in mờ bơyai lơh yàng git jơnau. “Jăt mờ bơhiàn bơh kòn cau Bơnhàr bol añ dê, ală ùr bơklao gam kơnờm, pa lik ơm is den tŭ lơi kung lơh ngan tàm broă lơh sa, prăp phan, bơ̆t bơtàu hìu nhă, lơh sa mờ kơ̆p kờñ lơh yàng kah ưn ngài, ưn ngài mè bèp neh ròng siam he bơh dềt tus dờng. Mờ kơ̆p kờñ mè bèp sùm pràn kơl dang, sùm bơto bơtê kòn sao pal lơh ngan lơh broă sa bè ală cau ndai dê”.

Jăt ồng Hyêt, 62 sơnam, kis tàm ƀòn Piơm, ƀòn drà dềt Đăk Đoa, càr Gia Lai yal, lơh yàng kah ưn ngài mè bèp mìng geh lơh tàm hìu nhă is, jơi nòi is, mơya lơh Yàng do geh bơyai lơh dờng ngan. Tơnơ̆ mờ tŭ lơh yàng, tàm nùs nhơm chờ hìu nhă dê, drăp tơrnờm geh siah bềng dà, poăc sur, poăc iar neh buh lài, cau kòn lơh yàng, ai jơrlŭ bềng poăc sur mờ ală phan sa bơkah ngan nàng yờ mè bèp sào, kơ̆p kờñ mè bèp sùm pràn kơl dang mờ pà mè bèp in ală oà, ồi yau, ntrờñ ờs mờng ha là ală phan ngui tàm rài kis pah ngai. Pơn jăt mờ hơ̆, jà jơh ală oh mi pròc mhàm ñô tơrnờm; mờ tơl nă cau kung geh dờp 1 bơngàn poăc sur. Tŭ do, ală cau tàm hìu ñô sa bal, chờ gờm bal mè bèp, yal bè ală jơnau kah wơl tàm rài kis pah ngai tŭ gam dềt neh geh mè bèp ròng siam bè jơnau đơs pơn đik: “Kơnờm dà toh mè den tàng hơ̆ sồng dờng, pràn kơl dang-Kơnờm mờ bè mèp bơto, ròng siam den tàng geh rài kis bè tŭ do”. Ồng Hyêt yal tai: “Broă oh kòn lơh yàng kah ưn ngài là kờñ tơlik nùs nhơm kờñ gơboh mờ mè bèp, kah sùm broă ròng siam bơh mè bèp dê, ròng siam gơs dờng pràn mờ tŭ mè bèp gam kis den oh kòn bơyai lơh, nàng mè bèp geh sào sa phan bơkah bơh mpàng tê kòn lơh gơs. Gam sur den dờng ha là dềt ờ di lơm, mơya tàm ngai lơh yàng pal hòi jà oh mi pròc mhàm, jơi nòi tus bal…”.

Ồng Hyưk, 64 sơnam, kis tàm ƀòn Piơm, ƀòn drà dềt Đăk Đoa pà git, bŭ lah pas gơs ha là rơƀah rơƀừp, bơh yau tus tŭ do, kòn cau Bơnhàr sùm kơ̆p kờñ geh lơh yàng kah ưn ngài mè bèp in. “Gơwèt mờ làng bol kòn cau he bơh yau tus tŭ do ờ geh lơh yàng lơi nàng jờng rơ cau neh ròng siam he, mìng lơh yàng git jơnau, peh sur ha là di lah pas den sreh kơnrồ nàng lơh yàng mè bèp in. Lơh yàng do geh sền là broă kờñ ưn ngài mè bèp neh ròng siam bơh tŭ deh tus dờng den tàng ală cau ndrờm kờñ lơh geh”.

Geh oh kòn lơh yàng git jơnau là bơta chờ dờng ngan bơh mè bèp dê. Bơh tŭ hơ̆ mè bèp gơlơh gơboh gơbài tài oh kòn git jơnau mờ chờ hờp tài oh kòn neh dờng pràn, geh rài kis hìu nhă is kơ̆ kơl jăp, dong kờl mè bèp tơrmù ală bơta kơlôi rơcang. Bi Lứi, 40 sơnam, kis tàm ƀòn Djrông, sàh A Dơk, kơnhoàl Đăk Đoa yal, di lah ờ hềt geh tơl pràn nàng lơh yàng git jơnau den tàm rài kis pah ngai kơlôi rơcang ngan mờ sùm gơlơh ƀàs sìl. “Să tờm añ tŭ do ờ hềt jai lơh yàng kah ưn ngài mè bèp in, să tờm añ gơlơh kơlôi rơcang ngan mờ lơh ngan nàng geh tơl pràn lơh yàng git jơnau mè bèp in, kơ̆p kờñ mè bèp sùm pràn kơl dang, kis chờ mờ oh kòn kòn sao. Do kung là lơh yàng nàng añ bơto sồr ok kòn pal geh sùm rài kis git jơnau, gơboh kờñ cau dờng, là broă lơh niam bơnĕ ngan neh geh sùm bơh git nđờ rơnàng kòn cau dê”.

Tàm rài kis tŭ do, kòn cau Bơnhàr sùm prăp gàr bơhiàn kah ưn ngài nàng bơto bơtê, lam sồr oh kòn kòn sao pal git gơboh kờñ, git jơnau mờ mè bèp, do là ală cau neh deh mờ ròng siam he tus dờng pràn. Bơh broă lơh yàng do, bơta niam tàm hìu nhă, oh mi ngai sơlơ đềt mềr bal rơlao… Do mùl màl là dùl bơta niam bơnĕ ngan tàm rài kis niam chài mpồl bơtiàn kòn cau Bơnhàr dê.