Ngui niam bơta ù tiah ƀòn lơgar brê bơnơm geh is bơnĕ ngan, mờ geh ơm tai tàm tiah tam kơnuh sơnơm Ngọc Linh Kon Tum, làng bol ƀòn Tu Thó bal mờ bàr pe nă cau bơcri priă neh lơh gơs ală homestay, lơh uă sươn bơkàu, chi lơh rùp bơka; lơh gơs mpồl cing mồng tam ya xoang, mpồl trŭ gơm biăp piang drơng năc lòt nhơl in. Nam do òr, ƀòn Tu Thó wă 5 rbô nă năc lòt nhơl. Tàm dơ̆ yal Jơnau lơh nền bơh Anih duh broă Làng bol càr Kon Tum dê dờn dờp ƀòn ntrờn ơm kis pa Tu Thó, sàh Tê Xăng là Ƀòn lòt nhơl mpồl bơtiàn, Anih duh broă Làng bol kơnhoàl Tu Mơ Rông bơyai lơh tăc tàm pơrlòng giă 1 kĭ kơnuh sơnơm Ngọc Linh, dong kờl làng bol lơh hìu jòng rò năc lòt nhơl.

Dơ̆ do, Sở Niam chài, Tàp pràn să jan mờ Lòt nhơl càr Kon Tum kung pà làng bol ƀòn Tu Thó in dồ bòr cing kwơ. Broă ƀòn Tu Thó tàm tiah tam kơnuh sơnơm Ngọc Linh Kon Tum geh dờn dờp là ƀòn lòt nhơl mpồl bơtiàn pờ tơlik tŭ niam nàng bơtàu tơngguh lòt nhơl mờ prăp gàr niam chài ờs mờng bơh yau bơh cau Sơdàng dê.