Gùng drà ơlak vang, cê, kơphê mờ phan bơkah pơnrơ Dà Làc- Lâm Đồng geh 34 mpồl lơh sa kă bro tàm càr tus bal lơh cơldŭ ràng phan. Bal mờ ơn pơdơng ràng tơlik ală phan bơna lơh bơh phan lơh geh bơh sươn sre, phan bơna geh pà sră cơng tàng OCOP, tŏp măt kă bro “Dà Làc- Cồng nha lơh geh crih crài bơh ù niam dê” mờ ală phan bơna mùl gŏ is pơnrơ ngan bơh tiah do dê, ală cơldŭ ràng tăc phan gam lam lơh broă lơh lòng sa phan bơna mờ tăc tơrmù giă ală phan bơna bơkah pơnrơ is bơh mpồl lơh broă he dê lơh gơlik mờ lơh is phan.

Jăt ồng Phạm S, Phó Củ tịc Anih duh broă Làng bol càr Lâm Đồng dê đơs, broă lơh nàng kờñ sơlơ yal tơnggĭt tai, yal tơnggĭt uă ală phan bơna ơlak vang, cê, kơphê mờ phan bơkah pơnrơ is Dà Làc- Lâm Đồng dê tus mờ năc lòt nhơl bơh tàm lơgar mờ bơdìh lơgar in. Mơkung lơh geh tai anih lòt còp, blơi phan, drơng làng bol mờ năc lòt nhơl in tàm dơ̆ Festival Bơkàu Dà Làc dơ̆ 10 mờ sa tềp Tây nam 2025.