Jăt jơnau pin dờn bơh cau Jrai dê, tơnơ̆ tŭ chơ̆t, hwềng suàn kung gam ơm gùt dar tàm tiah lơi hơ̆ sơl, đah cau chơ̆t mờ cau kis kung gam sơl bơta tàm gơrềng. Tài bè hơ̆, pah ngai cau kis kung gam lòt còp bơtô ƀồc cau pròc mhàm dê, pơs wàs rơndăp tăp sèng sàng goh ngan mờ lòt jun biăp piang ai cau neh chơ̆t in. Tơnơ̆ dùl tŭ tơngai, broă lơh do mìng tơn jơh tơnơ̆ tŭ cau lơh dơ̆ lơh yàng bơthi ƀồc. Nàng tam gơl să gơgơs cà bŏ tàm dơ̆ lơh yàng bơthi ƀồc, ndrờm bè ală hwềng cà, cau rwah ală rùp dà bŏ gơ in đềt lơbơn ngan, niam mờ bong làm jơh să bồ. Tam gơl să sơlơ iơh, sơlơ krơi sơƀơi, sơlơ ndrờm bè cà den sơlơ niam. Tàm dơ̆ lơh yàng bơthi ƀồc pal geh Cà bŏ. Bi Siu Thỏi, kòn cau Jrai kis tàm sàh Ia Mơ Nông, kơnhoàl Chư Păh, càr Gia Lai, pà gĭt: “Jăt bơta mờng kwèng bơh cau Jrai dê, tŭ lơh yàng bơthi ƀồc pal geh cà bŏ. Ai bŏ tra tềng muh măt gơgơs cà bŏ”.

Cau Jrai đơs là, ală Bram là ală hwềng cà lơbơn niam, sền gàr ai cau chơ̆t in pleh klàs bơh ală cà jàñ lơh pờng, halà tơnggŏ să bơh ală cau neh chơ̆t dê rê hờ dunia, nhơl chờ hờp bal mờ ƀòn lơgar gùt dar tiah hìu ƀồc. Bi Rơ Châm H’Xuyết, kòn cau Jrai kis tàm sàh Ia Mơ Nông, kơnhoàl Chư Păh, càr Gia Lai pà gĭt: “Cau tam gơl să gơgơs bè cà bŏ tàm tŭ lơh yàng bơthi ƀồc. Tŭ lơh cà bŏ cau pal mpồn măt, mpồn muh măt. Muh măt tam gơl gơgơs cà bŏ tra bong bŏ ù tềng muh măt halà ndau muh măt krơi lơh bơh tờm prìt nàng ndơl muh măt cau lơh cà bŏ dê. Cà bŏ pơrya ai cau neh chơ̆t mờ cau gam kis in”.

Cau geh rwah lơh Bram pal là ală cau pràn kơldang, geh bơngă pin dờn. Tam gơl să pal gơ in chài ngan, lơh bè lơi ờ lời ai cau ndai in đal gĭt he, dilah gơtìp đal gĭt kung geh gơtha sơl là ală Bram ờ lơh sir kơnòl broă mờ rơ̆p gơtìp cà kŭp.

Bi Rơ Châm Hà, kòn cau Jrai ơm tàm sàh Ia Mơ Nông, kơnhoàl Chư Păh, pà gĭt: “Cà bŏ sùm tơnggŏ să tàm dơ̆ lơh yàng bơthi ƀồc mờ bè ngai bè ờs den ờ gŏ. Mìng geh cau klau lơh pơgăp cà bŏ mờ ờ geh cau ùr lơh pơgăp cà bŏ ờ. Ờs geh cau dờng mờ cau kơnòm lơh pơgăp cà bŏ, gơ jăt tàm jơnau sồr, săc rwah bơh tờm lơh yàng bơthi ƀồc dê. Rài yau, cau lơh pơgăp cà bŏ sùm pal wèr bơkal ngan. Cau lơh pơgăp cà bŏ ờs pal là cau geh pơ ùr neh chơ̆t halà ờ hềt geh hìu bơnhă”.

Ală Bram sùm geh ki ngàm, pal geh mpồl cing mồng coă rò bơh tiah tam gơl să tus tơn tềng tiah hìu ƀồc. Tơnơ̆ tŭ lơh pơgăp cà bŏ tàm tiah hìu ƀồc, ală Bram rê wơl mờ rài kis geh ngan. Ală cau lơh pơgăp Bram bal mờ làng bol ƀòn lơgar ñô sa, đơs crih tam ya, boh bơr nggồc nggàc chờ hờp chờ hờn ngan. Bi H’Uyên Niê, Phó Củ tịc Mpồl Cau ùr sàh Ia Mơ Nông, pà gĭt: Bram tơnggŏ să tŭ lơh yàng bơthi ƀồc mờ ngai bè ờs ờ geh. Bram pơrya ai ală hwềng suàn cau neh chơ̆t in, cau rê cau lòt ñô sa chờ hờp bal ngai lơh yàng lơh chờ ñô sa dŭt ndơl. Geh gơtha là tơnơ̆ hơ̆ ngai hơ̆, cau ờ geh cèng biăp piang tus hờ hìu ƀồc cau chơ̆t dê tai. Bram là ală kòn bơnus ngan ngồn mơya tam gơl să gơgơs ală wềng suàn cà dê. Cà bŏ gơtùi lòt rê tìp măt, lòt gùt dar tiah hìu ƀồc nàng tìp măt bal mờ ală cau tàm jơi nòi, tàm hìu bơnhă dơ̆ lồi dŭt nàng cau lòt tus dunia đah ne”.

Cau Jrai đơs là cau neh chơ̆t mờ cau kis kung gam geh sơl bơta tàm gơrềng. Tam gơl să gơgơs Cà Bŏ tàm dơ̆ lơh yàng bơthi ƀồc, tơnggŏ nùs nhơm kah nđàc, ki ngàm bơh cau gam kis dê gơ wèt mờ cau neh chơ̆t. Cau kơ̆p kờñ hwềng suàn cau chơ̆t dê jơm glòm, ai lơngai lơngò ai cau gam kis in pràn kơldang, ƀòn lơgar geh rài kis lơngăp lơngai, hờm ram, gơboh gơbài.