Tiah tềl lời wơl Anih lơh sa suơn dờng Rossi, ơm tàm gùng Trần Hưng Đạo, sơnah ƀòn Đạt Hiếu, ƀòn drà dờng Buôn Hồ, là dùl tàm ală Anih lơh sa suơn dờng tam kơphê mờ kao su bơh cau lơgar Tây dê crơnggơs tàm càr Dăk Lăk tàm nam 1926. Do là tiah tềl lời wơl bè srơh tam lơh kăc màng tàm Tây Nguyên tàm 2 dơ̆  tam lơh bơh jơi bơtiàn dê. Is ồn là tàm dơ̆ tam lơh tam dră mờ bol sò tơm lơgar Mỹ, tàm Anih lơh sa suơn dờng Rossi neh lơh geh 1 mpồl Đảng, dùl Ci đoàn Ơruh pơnu mờ mpồl ling gàr ƀòn mờ 16 nă cau lơh phan tus bal. Cau lơh phan mờ Cau tờm Anih lơh sa suơn dờng Rossi neh dong kờl ai, pà kòi phe, phan tam lơh ai kăc màng in; dong Mpồl Hòi jà tă pơgồp priă jền tàm làng bol bơh càr Dăk Lăk dê tam pơgơl blơi gĭt nđờ rơhiang tấn phan bơna nàng jun pơnđiang tus tàm tiah pôs đồng bơh càr dê. 

Bơh nam 2018, Anih lơh sa suơn dờng Rossi neh geh Anih Duh broă Làng bol càr Dăk Lăk ơn tàm mpồl Tiah tềl lời wơl kah yau kấp càr. Tŭ do tàm do gam geh broă lơh hìu ơm mờ lơh broă bơh cau tờm Anih lơh sa suơn dờng, tơrlung dà, hìu bềp, anih prăp lŭ, tiah dà mbòr hòr kung gam bè ờs lơm ală bơta mòn lơh bơh sơnrờp dê.

Nàng lơh niam wơl, ngui niam bơta kwơ Tiah tềl lời wơl Anih lơh sa suơn dờng Rossi drơng broă lòt nhơl in, Tiến sĩ Lương Thanh Sơn, lài do là Lam bồ Hìu prăp gàr phan kwơ yau Dăk Lăk đơs là, pal geh bơta sền tơrgùm bal gơwèt mờ tiah tềl lời wơl do: “Bol he mìng sền gròi tus hìu bơh cau tờm Anih lơh sa suơn dờng lơm mờ ờ hềt sền gròi tus ală hìu jòng bơh cau lơh phan kòn cau Rơđê tàm hơ̆ dê. Jơh bal tiah gùt dar là ală cau lơh phan neh pal kong bơta trồ tơngai duh, trồ mìu nàng lơh gơlik geh ală gar kơphê tàm Anih lơh sa suơn dờng do dê. Den tàng tàm kềng gah Anih lơh sa suơn dờng Rossi geh ƀòn lơi, gam nđờ nơm hìu jòng, hơ̆ là dùl bơnah bơh Anih lơh sa suơn dờng dê, ờ gŏ di mìng kơlôi chăng mìng Anih lơh sa suơn dờng hơ̆ lơm ờ, ñchi he ờ tàm tơrbŏ bal tàm hơ̆ nàng jun năc lòt nhơl tus bal”.

Tŭ do, gơnoar atbồ tiah do gam jòi broă lơh lơh niam wơl, lơh kơnhăp tiah tềl lời wơl Anih lơh sa suơn dờng Rossi mơkung bal mờ broă lơh yal tơngĭt, hòi jà lòt nhơl... Ồng Y Cing Mlô, Phó Củ tịc Anih Duh broă Làng bol ƀòn drà dờng Buôn Hồ pà gĭt: "Tơnơ̆ tŭ lơh niam wơl sir den ƀòn drà dờng rơ̆p bơyai lơh hòi jà pà is ală sră nggal, phan bơna lời kir nàng ràng tơlik, lơh tơngŏ wơl, bơt bơtàu broă lơh lòt nhơl pơgồp bal mờ ală tiah lòt nhơl ndai. Kung dan mờ càr ai tiah tềl lời wơl do là dùl tàm ală tiah tus bơh năc lòt nhơl dê. Bol añ kung rơ̆p sồr lơh nền bơh ală gah broă, is ồn là gah bơto bơtê rơ̆p rơwah tiah tus do là dùl tàm ală ù tiah tam lơh lài do bơyai lơh ală broă lơh đah bơdìh nàng bơto bơtê kah yau bơh yau dê, ngui niam tai bơta kwơ kah yau bơh tiah tềl lời wơl dê”.