Ƀòn Khá ơm rềp tơn gùng rơndeh dà lơgar 6, ngài mờ ƀòn drà dềt Yên Châu, kơnhoàl Yên Châu mờr 10 kơi sồ rê hờ đah Hà Nội. Ƀòn geh rlau 90 hìu bơnhă, rlau 420 nă làng bol, mờr bè 100% là kòn cau Thái lơm ơm kis. Tus mờ ƀòn Khá, năc lòt nhơl rơ̆p geh kờñ ngan iang ngan tàm ù tiah ngềt ngơ̆t niam bơnĕ ngan, brê bơnơm geh is bơh dồ ƀòn kòn cau Thái yô yau ngan dê, mờ jơh ală hìu ndrờm ơm tàm ală hìu rơng yau, gùt dar là sươn tờm pơ ò, tờm mil dờng jŏ nam bềng bơta ñhơm mrềt niam, geh hiòng dà croh Vạt gơ lòt gùt dar….

Ồng Quàng Văn Phanh, 80 sơnam là làng bol ƀòn Khá pà gĭt, làng bol tàm ƀòn tŭ do gam prăp gàr mờ ngui niam uă bơhiàn niam chài pơnrơ mùl gŏ krơi is ngan bơh làng bol Thái dê, bè đơs pơnđik, nhơl đờng goòng jơi bơtiàn dê; prăp gàr ală broă lơh mờ tê ờs mờng bơh yau tàñ ồi, wăc sềr rùp chèo piêu, tàñ ală bơta phan ngui tàm rài kis pah ngai, bal mờ ală dơ̆ lơh chờ lơh yàng ờs mờng bơh yau geh kwơ ngan răc kơ̆p kờñ pràn kơldang, kơ̆p kờñ dồ nam mìu nhàc niam, càl niam, phan tam geh tơnhàu uă: “Pah nam tus ngai 10 là pal lơh yàng dồ dơ̆. Lơh yàng ai làng bol ƀòn lơgar in pràn kơldang, lơh sa bơtàu tơngguh; mìr sre lơh geh uă kòi tơngời; rơpu kơnrồ pràn kơldang, ờ gơtìp kòp bơtờp”.

Bơh ală bơta ƀươn bơta pràn geh lài, kơnhoàl Yên Châu neh lam lơh jăt Ală jơnau neh lơh nền bơtàu tơngguh broă lơh tơrlòng lài lòt nhơl ƀòn lơgar tàm ƀòn Khá; tŭ tơngai lơh phan bơna lòt nhơl tàm 5 nam, mờ kờp jơh priă bơcri pơgăp 43 tơmàn đong, tơrgùm lơh ală broă tờm, bè: Mpồng còp să mŭt tàm ƀòn; lơh anih wă yờ năc tàm ƀlàng rơndeh ơm; anih ơn rơndeh mờ ală rơndeh đèng tàm ntrờn năc lòt nhơl mŭt tàm ƀòn gàr niam tiah ơm kis; ală anih tăc phan mờ jơnau nhơl nàng gĭt; lơh gùng lòt sền; lơh bơka niam wơl ù tiah gùt dar ƀòn, lơh ală anih jă brê…

Bè đah ƀòn Khá, lam lơh jăt Ală jơnau neh lơh nền neh săc rwah 5 hìu bơnhă geh tơl pràn lơh tam gơl wơl lơh ơnàng gơgơs homestay; 3 hìu bơnhă geh tơl pràn pờ hìu ñô sa phan sa jơi bơtiàn dê; 3 hìu bơnhă geh tơl pràn tàñ ồi, wăc sềr rùp chèo piêu, tàñ đơr gle che rơyah mờ tê drơng wă năc lòt nhơl; uă hìu làng bol tàm ƀòn Khá neh geh pơlam jơnau gĭt wă lơh lòt nhơl mpồl bơtiàn. Ƀòn kung lơh 2 mpồl đơs crih tam ya rài yau, sùm lam tàp mờ lơh ală broă lơh jơnau pơnđik, jơnau tam ya, jơnau nhơl đờng goòng nàng drơng năc lòt nhơl in. Bi Vì Thị Thanh, làng bol ƀòn Khá yal: “Hìu bơnhă añ geh cih măt dan lơh lòt nhơl. Tơnơ̆ tŭ cih măt, hìu bơnhă neh blơi ồi tơ̆ kơnền pa nàng rơcăng wă năc. Tŭ năc tus, bol hi sùm trŭ gơm ală phan sa bơh cau Thái dê, bè biăp bơlhong, biăp ƀon, ƀăng tơm bà, ka, iar buh…nàng drơng năc lòt nhơl in".

Ồng Quàng Văn Chiến, Phó Củ tịc Anh duh broă Làng bol sàh Sặp Vạt kung pà gĭt sơl: “Càr, kơnhoàl sền gròi geh gùng dà bơ̆t bơtàu ƀòn Khá là anih lòt nhơl mpồl bơtiàn, sàh bol hi chờ hờp ngan. Bol hi neh bal mờ kơnhoàl mờ mpồl bơto pơlam lơh broă lơh lòt lùp sền, rơndăp ù tiah wơl ală broă bơ̆t bơtàu lơh gùng ƀòn, lơh Mpồl lơh broă bal Lòt nhơl nàng làng bol bal mờ gơ̆p lơh mờ gĭt geh lơh lòt nhơl bè lơi”.

Jăt ồng Lù Văn Cường, Củ tịc Anih duh broă Làng bol kơnhoàl Yên Châu, nàng bơ̆t bơtàu ƀòn Khá gơgơs ƀòn lòt nhơl mpồl bơtiàn gơ jăt bal mờ bơ̆t bơtàu ƀòn lơgar pa, Anih duh broă Làng bol kơnhoàl Yên Châu neh sồr gah lơh broă geh gơnoar cih mờ pơlam lơh jăt ală broă jàu bè tiah ơm kis niam chài tàm anih lòt nhơl mpồl bơtiàn ƀòn Khá; pờ ală ơdŭ bơto pơlam, bơto, tơngguh uă bơta gĭt wă bè tiah ơm kis niam chài, lơh ală jơnau dipal bè ơm kis, broă lơh tàm tŭ boh bơr, lơh lòt kung bè tàm ală broă lơh kă bro lòt nhơl ndai. Bơdìh mờ ƀòn lòt nhơl mpồl bơtiàn kòn cau Thái kơnhoàl kung lơh broă rơndăp lơh prăp gàr, ngui niam bơta kwơ niam chài bàr pe jơi bơtiàn bè Mông, Xinh Mun…nàng kờñ ngui niam bơta kwơ niam chài bơh yau gơ jăt bal mờ lòt nhơl; bơh hơ̆, lơh gơlik geh broă tam gơl pràn chồl tơngguh bơtàu tơngguh lơh sa- mpồl bơtiàn tiah do in bơtàu tơngguh. Do là dùl tàm ală tơngume kwơmàng mờ kơnhoàl cih tàm jơnau rơcăng cih Jơnau lơh nền tàm pơrjum bơh Pơrjum dờng Đảng ƀộ kơnhoàl dơ̆ XX, tơngai lơh broă bơh nam 2026- 2030 rơ̆p geh lơh tàm nam tus.