Ală phan sa ndai sùm geh trŭ gơm barah brài nàng sa tơn, den phan sa ka sràt bơh cau Jeh- Triêng dê geh lơh kal ke ngan mờ kơrhia ngan tài bơh phan sa ờs mờng do ờ di mìng là phan sa tờm lơm mờ gam gơtùi ngui tàm tơngai jŏ jòng, ngui nàng yờ năc dờng halà ngui nàng pà cau ndai in. Do là phan sa ờ gơ tùi ờ geh tàm ală broă kwơ màng bơh ƀòn dê. Tài bơh broă lơh mờ broă rơwah ka kung nền nòn ngan sơl. Ka geh rơwah uă ngan là bơta ka Niên, ntìng lơbơn. Bi A Ghin, ơm tàm thôn Lao Đu, sàh Phước Xuân, kơnhoàl Phước Sơn, càr Quảng Nam, pà gĭt, ka tơnơ̆ tŭ kŭp rê pal geh lơh mơ. Ală cau ndai tàm hìu bơnhă ndrờm tus bal tàm broă lơh do tài bơh lơh mhar jài mờ gàr niam poăc ka pa ngan tŭ geh ơn tàm yăng dềt. Bi A Ghin pà gĭt: “Nàng lơh phan sa ka sràt bơkah den là pal rơwah ală ka Niên dờng mờ pa ngan. Tàm tŭ lơh ka den lơh tŭ ka gam pa ngan ờ gŏ di lời ka ồm. Tài bơh bè hơ̆ ka sràt hơ̆ sồng ƀô bơkah mờ bơkah ờ”.

Ka Niên tơnơ̆ tŭ ròt jơh pròc, ka geh rào dồ dơ̆ tai, tơnơ̆ hơ̆ tah jat gah gòr ntìng mờ lời rơ sơh ngan den hơ̆ sồng bơr lŭ bal mờ ală phan tĕ. Ka dờng geh lơh lài nàng ơn lài tàm yăng dềt, ka dềt ơn hơđang. Broă lơh ka sràt geh ală broă lơh is rơmis ngan. Nàng lơh geh ală yăng dềt ka sràt bơkah, pal lơh jat broă lơh mờ bơta chài tàm bơrlŭ phan tĕ bơh cau lơh dê. Dùl bơta krơi ngan tàm phan sa ka sràt dê là ờ ngui tơngi mờ sền gròi ngan tàm broă gơ tam klài bal ală bơta sràt, hòi mờ hăng dê. Ală bơta do geh tàm bơrlŭ is ai tơl nơm ka . Den tàng bơh tơnơ̆ rlau bơh 15 tus 20 ngai rơ̆p lơh poăc ka wền, ờ geh tơngi, geh bơta ƀô bơkah bơh poăc ka dê, geh tai bơta sràt, hòi lơh cau sa gơ lơh bơkah ngan tàm bơr. Bi A Ghin pà gĭt tai: “Ka sràt là phan sa ờs mờng, bol añ lời phan sa do tàm ală ngai lơh chờ dờng bơh ƀòn dê nàng yờ năc, gơ̆p bơyô rềp ngài tài bơh do là phan sa bơkah pơn rơ bơh bol añ dê. Gơwèt mờ bol añ, phan sa ka sràt là kwơ ngan tài bơh là phan sa ờs mờng bơh ồng mò bơh rài lài do dê lời wơl mờ tŭ do rơnàng oh kòn kòn sau he dê pơn jat tai sền gàr lơh jat”.

Broă lơh ka sràt bơh kòn cau Jeh- Triêng dê jat tàm bơta mờng chài neh lời wơl lơm mờ geh mbàng lời wơl bơh rài do tus rài ne. Kung bơh bơta do neh lơh ai phan sa ka sràt kòn cau Jeh- Triêng dê ờ ndrờm mờ khat dùl jơi bơtiàn lơi ndai. Phan sa bơh yau do neh gơ jat bal mờ rài kis bơh làng bol kòn cau Jeh- triêng dê. Tŭ khi lòt lơh broă tàm mìr khi cèng bal ka sràt sa bal mờ piang ƀuơn ngan, mơkung gàr tơl pràn kơl dang să jan. Tàm ală tiah ndai tàm kơnhoàl, ka sràt sùm geh tàm bơrlŭ bal mờ ƀòk phe halà piang mơya làng bol kòn cau Jeh- Triêng tàm thôn Lao Đu den rơ wah ƀòk tơngời nàng tri să tàm ka geh bal dồ ết bòk ngòk, mrĕ ƀòk pal là mrĕ tam tàm mìr hơ̆ sồng gơtùi geh bơta bơkah ngan mờ lời yăng dềt ka dê geh jŏ.

Nàng geh yăng dềt ka sràt bơkah den ka sùm geh lơh sràt tàm yăng ù buh, khà ka kờp bal bơh 1 tus 1 kĭ nggùl tơl nơm yăng dềt. Broă dơ̆p yăng dềt tơnơ̆ tŭ lơh jơh kung geh kờp sền, dilah hìu bơnhă lơi geh broă wèr den ờ gŏ ngui nha prìt nàng dơ̆p mờ pal ngui nha trau, 1 bơta nha mìng geh tàm tiah do dê. Tơnơ̆ tŭ lơh sir, yăng dềt rơ̆p geh ơn tàm dồ gah kềng gah bơnhă ồs. Bè hơ̆, tơngai ngui rơ̆p geh mhar rlau mờ ală phan ndai ờ gơtùi mut lơh bơ̆. Tŭ geh năc den ai sa nàng yờ năc tơngŏ bơta ki ngàm năc bơh làng bol tiah kơh bơnơm dê.

Nàng ka sràt in bơkah rlau, tŭ ngui, làng bol tĕ tai dồ bơta nha is pơn rơ ngan bơh tiah do dê nàng ka in ƀô bơkah mờ gơ kờñ rlau tai. Sa phan sa ka sràt tàm ală tŭ bơtòm tơrgùm geh kwơ nùs nhơm dờng ngan. Hơ̆ ờ mìng là dờp geh cồng nha lơh broă lơm mờ gam là bơta tàm pơrdờn bơhiàn niam chài phan sa bơh ồng pàng dê lời wơl.

Ka sràt bơh kòn cau Jeh Triêng dê geh bơta pơgồp bơnĕ bơnài bal phan lơh geh bơh brê bơnơm mờ dà dờng dê geh sền là dùl phan sa bơh yau sùm geh mờ ală dơ̆ sa, ală ngai lòt lơh broă tàm sre, mìr halà tàm ală dơ̆ lơh chờ bơh ƀòn dê. Ală cau lơi neh lòt tàm ù tiah Lao Đu, tŭ mut tàm hìu bơh cau Jeh- Triêng dê ndrờm ƀuơn ngan dờp gĭt hìu bơnhă lơi kung geh lài bàr pe yăng dềt ka sràt nàng lời ngui rơ hời. Di lah geh uă, khi kung tam pà bal mờ làng bol ƀòn lơgar sơl mờ dùl bơnah lời yờ năc kwơ tàm ală dơ̆ hìu bơnhă geh broă kwơ màng.