Broă lơh dà màn ờs mờng Phan Thiết geh bơh ală nam lồi rài XVII, geh ală cau ntrờn ơm kis bơh Quảng Bình, Quảng Trị, Quảng Nam, Quảng Ngãi, Bình Định, Phú Yên (măt sơnđan lài mờ tŭ tơmŭt bal càr),… lòt jăt ală mpồl ka Kàl đah jum (bơh nhai 5 tus nhai 11 pah nam) tàm tiah dà lềng Phan Thiết dê nàng lơh ka mờ ơm kis ing nàng lơh dà màn, kơ̆p tus jơh kàl hơ̆ sồng rê wơl.

Tài geh khà phan tàm dà uă bơta, khà đạm geh uă bal mờ bơta niam trồ tiah tơngai duh gơdờp ngan mờ broă lơh dà màn, den tàng bơh broă lơh geh 20, 30 lít nàng sa tàm hìu, rơhời làng bol neh lơh geh uă rơlao nàng tăc mờ ală cau tàm drà bal mờ tàm tiah ƀòn in kờñ sa, bơh tŭ hơ̆ lơh gơs dùl broă lơh dà màn tàm Phan Thiết dê. Măt kă bro dà màn Phan Thiết ờ mìng geh bơh lài mờ tus tŭ do kung gam geh pơnrơ ngan, geh tăc tus ală lơgar tàm dunia.

Ồng Trần Ngọc Dũng, Kwang lam bồ Kông ty TNHH Seagull (sơnah ƀòn Phú Thủy, càr Lâm Đồng là cau neh ai măt kă bro dà màn ờs mờng Phan Thiết (do là măt kă bro dà mànTĩn), dơ̆ sơnrờp geh tơlik tàm dra tăc phan tàm siêu thị dờng tàm lơgar Mỹ pà git, ồng pơnyờ să ngan tŭ dà màn ờs mờng bơh Phan Thiết dê neh geh tăc tàm drà kă bro lơgar Mỹ. Là cau kòn Phan Thiết dê, bơh dềt ồng Dũng neh git uă jơnau yal bè dà màn Phan Thiết. Tus dờng, ồng kơ̆p kờñ ală jơnau bè dà màn Phan Thiết geh prăp gàr mờ lơh geh uă, den tàng neh lơh Hìu prăp gàr Dà màn. “Bơh nam 2016 tus nam do là 10 nam bloh, kung gam lơh ngan lơh geh sùm ală phan niam chài tàm do. Tàm Hìu prăp gàr Dà màn geh ală khà phan jờng rơ broă lơh ka, broă lơh boh, broă lơh dà màn mờ ală mò ồng rài lài do lơh geh dà màn Phan Thiết do. Bal mờ Hìu prăp gàr Dà màn do là jơnau kơ̆p kờñ lơh geh wơl măt kă bro dà màn Tĩn bơh ală rơnàng lài do dê, ală oh mi neh rơlao 60, 70 sơnam, kung gam kah sùm”.

Jăt Mpồl lơh Dà màn Phan Thiết, hơ̆ là ƀòn dờng Phan Thiết lài do geh rơlao 200 hìu lơh dà màn, pah nam tăc tàm drà kă bro di pơgăp 22 tơlăk lit dà màn mờ priă geh mờr 1 rơbô tơmàn đong, ai geh broă lơh 400 nă cau in mờ git nđờ rơbô nă cau lơh broă jăt kàl. Broă lơh dà màn kung tăc geh di pơgăp 22 rơbô tấn ka tàm 1 nam, pơgồp bal tàm broă dong kờl cau lơh ka geh broă lơh sùm tàm dà lềng.

Ồng Trương Quang Hiến, Củ tịc Mpồl lơh Dà màn Phan Thiết pà git, bơta krơi is bơh dà màn Phan Thiết pơn drờm mờ tiah ndai là geh dà rơmit bè rơhe (phan lơh là ka piang) ha là geh dà jù di mơ (phan lơh là ka nuc); sàng, àng niam, ƀô thồm, lơngồt tài geh uă đạm. Bơta krơi is do tus bơh broă jơm lời tàm trồ tơngai duh, càl mờ bơta duh bè ờs uă bơh trồ tiah tàm tiah đah Jum tàm Gùl lơgar dê lơh gơrềng niam tus mờ broă lơh gơs dà màn mờ tàm tiah ndai ờ geh. “Lơgar Việt Nam he geh git nđờ tiah lơh dà màn uă. Bè tàm Phan Thiết, Phú Quốc, Nha Trang ha là Cát Hải. Mơya Phan Thiết den dà màn jăt mờ sră nggal geh cih lời wơl kung pal neh rơlao 300 nam bloh. Geh bơta tài bè lơi tàng he ờ lơh geh sră nggal nàng dan lơh gơs phan lời wơl ờ di phan bơna dà lơgar dê gơwèt mờ dà màn den broă do kung là tài ờ lơh geh bơh Mpồl dê. Lơh ngan broă do he pal dan bơh jŏ ngan bloh, tus tŭ do hơ̆ sồng sơn đờm lơh den gŏ bơta kwơ bơh dà màn dê pal geh lơh”.

Jăt Sờh Niam chài, Tàp pràn să jan mờ Lòt nhơl càr Lâm Đồng đơs, bơh tàm broă sền tơngu me tờm bè rài lơh geh, broă lơh bal mờ bơta kwơ bơh broă lơh dà màn ờs mờng Phan Thiết dê tàm pang sră dan bơh Mpồl lơh Dà màn Phan Thiết, mờ geh pơn drờm bal mờ pang sră kờp phan lời wơl niam chài ờ di phan bơna “Broă lơh dà màn ờs mờng Phan Thiết” dê pà gŏ, broă lơh do geh tơl ală khà broă, jơnau kờñ nàng lơh Sră yal Ƀộ Niam chài, tàp pràn să jan mờ Lòt nhơl in sền nàng git, ai tơmŭt tàm Khà măt phan lời wơl niam chài ờ di phan bơna dà lơgar dê di jăt mờ jơnau geh ai.

Mờ bơhiàn lơh dà màn tàm rơlao 50 nam, ồng Nguyễn Hữu Dũng, Kwang lam bồ Kông ty TNHH Dà màn Bà Hai (sơnah ƀòn Phú Thủy) pà git, ồng chờ hờp ngan tŭ kơno jơnau yal do, tài do là tơngu me tờm nàng tơnguh bơta pràn krơi is ù tiah dê. “Măt kă bro dà màn Phan Thiết kung neh geh bơh jŏ rài, git nđờ nam do bloh. Broă lơh phan OCOP he neh geh bloh, jơnau sơnio ù tiah lơh he kung neh geh bloh, bal mờ bơta ƀuơn tềng gah dà lềng nàng lơh broă lòt nhơl bè do là niam ngan. Mơya geh jơnau dờp den pal geh broă lơh ngan tai bơh jơh ală gah bè đah gơnoar atbồ, bè đah ală hìu lơh, ală kông ty gam lơh dà màn dê, he lơh nàng dà màn niam rơlao, bơh tŭ hơ̆, he hơ̆ sồng tơnguh geh măt kă bro bơh dà màn dê nàng pah ngai geh tăc ngài uă rơlao”.

Làng bol tàm Phan Thiết lơh geh dà màn neh pơgồp bal tàm broă lơh dơ̆ sào sa tàm hìu nhă geh tai phan bơkah ờ gơtùi pơn drờm mờ ală phan ndai. Đơs tus Phan Thiết là đơs tus dà màn mờ đơs tus dà màn là kơlôi mơ tus Phan Thiết. Broă lơh dà màn Phan Thiết ờ mìng geh pơnrơ mờ gam geh bơta kwơ uă bè lơh sa, bơta kwơ priă geh bè bơh broă lơh dà màn tus mờ git nđờ rơbô tơmàn đong tàm 1 nam mờ pơgồp bal tàm broă lơh pràn lơh sa mpồl bơtiàn tàm tiah do bơtàu tơnguh. Bơh ală bơta kwơ bè hơ̆, mpồl bơtiàn làng bol bal mờ ală mpồl lơh sa kă bro tàm tiah do kơ̆p kờñ “Broă lơh dà màn ờs mờng Phan Thiết” rơ̆p geh ai tàm Khà măt phan lời wơl niam chài ờ di phan bơna dà lơgar nam 2026 dê.