Do là ƀòn dơ̆ 4 bơh càr dê geh dờp là ƀòn lòt nhơl mpồl bơtiàn. Bơh lồi nam 2023, jăt Jơnau lơh nền sồ 2433 bơh Anih duh broă Làng bol càr Dăk Lăk dê, ƀòn Tơng Jú geh dong kờl phan bơna, phan ngui măy mŏk, đờng goòng nàng lơh, blơi măy tíñ, kơƀàng, cơghê, mờ lơh pang yal tơnggĭt jơnau tàm internet lòt nhơl nàng bơtàu tơngguh lòt nhơl mpồl bơtiàn jăt gùng dà lơh sir rlau. Jăt Sở Niam chài, Tàp pràn să jan mờ Lòt nhơl càr Dăk Lăk dê yal, ƀòn Tơng Jú là dùl tàm 4 ƀòn geh dờp là ƀòn lòt nhơl mpồl bơtiàn tàm nam do bal mờ 3 ƀòn là ƀòn Tuôr tàm ƀòn dờng Buôn Ma Thuột, ƀòn Kly A tàm ƀòn drà dờng Buôn Hồ, mờ ƀòn Jun tàm kơnhoàl Lăk.

Do là broă lơh dờng bơh gah lòt nhơl dê wèt tus chờ gờm tơngkah 120 nam tơnggơs càr Dăk Lăk. Bè hơ̆, tus tŭ do, càr Dăk Lăk neh geh 7 ƀòn lòt nhơl mpồl bơtiàn geh lơh gơs mờ ai mŭt lơh broă.