Khà kờp do geh yal tàm pơrjum tơn jơh broă lơh nam 2025, lam lơh kơnòl broă nam 2026 bơh gah Niam chài, Tàp pràn să jan mờ Lòt nhơl càr Dăk Lăk dê. Lòt nhơl càr Dăk Lăk geh bơta tam gơl pràn ngan mờ kờp jơh priă lơh geh nam 2025 kờp dŭ geh rlau 13 rbô 600 tơmàn đong, sơrlèt rlau 8% pơndrờm mờ broă rơndap lơh. Kờp jơh khà nac lòt nhơl geh rlau 7 tơlak 300 rbô dơ̆, gơguh rlau 16% pơndrờm mờ broă rơndap lơh. Gùt càr tŭ do geh 782 anih ơm wơl bic mang, gơguh 34 anih pơndrờm mờ nam 2024, lơh gơlik bơnàng jă nàng lòt nhơl rơhời gơ gơs là gah lơh sa kuơmàng bơh càr dê.

Nam 2026, càr Dăk Lăk git nền pơn jat tai ngui niam gơnoar broă bơh niam chài dê tàm bơt bơtàu kòn bơnus mờ tiah ơm kis mpồl bơtiàn niam bơnĕ, tơrgùm rơcang ală bơta pal geh nàng bơyai lơh pơrlòng tàp pràn să jan ală kâp; lam lơh geh cồng nha Nam lòt nhơl càr Dăk Lăk 2026, bơh hơ̆, lơh gơlik bơta gơn kơnờm ai gơguh lơh sa mờ bơtàu tơnguh kơnhăp kơ̆ in tàm tơngai pa.