Nam 2025, lòt nhơl Gia Lai pơn jat tai gơguh niam ngan mờ rlau 12 tơlak dơ̆ năc, gơguh rlau 17% pơndrờm mờ nam lài; kờp jơh priă lơh geh pơgăp 29 rơbô tơmàn đong. Nam 2026, Gia Lai lơh ngan wă 15 tơlak dơ̆ năc lòt nhơl, gơguh 21% pơndrờm mờ nam 2025; kờp jơh priă lơh geh bơh lòt nhơl pơgăp 35 rơbô tơmàn đong. Nàng lơh geh jơnau kờñ do, bal mờ khà gơguh bơh nam 2025 dê, càr rơ̆p pơn jat tai bơcri priă lơh ală phan bơna bơt bơtàu, anih ơm ing, drơng broă mờ tơnguh uă bơta niam mpồl cau lơh broă lòt nhơl in.

Mò Nguyễn Thị Kim Chung, Phó Kwang lam bồ Sờh Niam chài Tàp pràn să jan mờ Lòt nhơl càr Gia Lai pà gĭt, nam Lòt nhơl 2026 tàm Gia Lai gam geh mut lơh bơh 155 broă lơh, tàm hơ̆ geh 21 broă lơh bơh Ƀộ Niam chài, Tàp pràn să jan mờ Lòt nhơl dê bơyai lơh, 34 broă lơh pơgồp bal mờ ală càr, ƀòn dờng mờ 100 broă lơh bơh càr dê đơng lam.