Tàm hơ̆, Lơh chờ Phan lời wơl kơphe gùt plai ù geh bơyai lơh bơh ngai 18 nhai 12 nam 2025 tus ngai 02 nhai 01 nam 2026, mờ bơta tơngŏ tờm là lơh phan lời wơl kơphe gùt plai ù, tiah ràng tơlik - hùc dà kơphe, sa phan mờ ală broă lơh đơs crih tamya bè mang đơs crih kơphe - ƀòn dờng Bơnơm, rùp să tiah Đah jum câu Mỹ, Noel mờ chờ gờm nam pa 2026. Ồng Nguyễn Văn Lộc, Kwang lam bồ Sờh Niam chài, Tàp pràn să jan mờ Lòt nhơl càr Lâm Đồng đơs nền, kơphe ờ mìng là phan geh bơh broă lơh sa tờm mờ gam là rùp rài niam chài, phan lời wơl kis pơgồp bal mờ rài lài do, rài kis mờ bơta niam chài bơh uă lơgar dê.

Mờ rơlao dùl rài gơs dờng pràn mờ bơtàu tơnguh, càr Lâm Đồng neh ai tơngŏ gơnoar kwơ màng tàm mpồl bơta kwơ kơphe lơgar Việt Nam dê, pơgồp bal mờ lơh geh bơta bơkah uă, lơh gơs nền nòn, bơceh lơh mờ lòt nhơl kơphe. “Bơh ală broă lơh, ràng tơlik, tìp bal niam chài mờ pơrjum ală lơgar, lơh chờ rơ̆p ai geh dùl pơrjum cri bơyai pờ, tiah kơphe lơgar Việt Nam geh ơn tàm ñhòng hòr bal bơh phan lời wơl kơphe dunia dê. Tàm tơngai tus, càr Lâm Đồng kơ̆p kờñ lơh chờ rơ̆p gơs broă lơh sùm pah nam geh bơngă pin dờn, cèng geh uă bơta niam càr Lâm Đồng dê, là anih pơrgon bơh ală cau gơboh kờñ kơphe tàm gùt dunia dê”.

Tàm broă bơyai lơh chờ geh bơyai lơh Pơrjum kơphe ală lơgar, ală broă lơh lòt tàm gùng drà bal mờ yal Mpồl lơh kơphe Việt Nam mờ Dunia, hòi jà geh gal làng bol bal mờ cau năc tus bal, pờ geh dơ̆ niam nàng tơnguh broă lơh broă bal ală lơgar, lơh pràn bơtàu tơnguh kơl jăp gah lơh kơphe mờ lòt nhơl niam chài bơh Dà Làc, càr Lâm Đồng dê. Tàm trồ tiah mrềt niam krơi is bơh Dà Làc dê, tiah gùt dar tơnao dà Xuân Hương àng gơcrà mờ duh hồl mờ Lơh chờ lòt gàm gùng drà, do là dùl broă lơh pơnrơ ngan tàm broă bơyai lơh Chờ Cing mồng tiah Đah jum Măt tơngai Lik câu Á nam 2025 dê. Tàm ù tiah niam bơnĕ bơh tơnao dà, brê nho bal mờ bơkào lì, săp dròng cing mpong sùm, bal mờ săp tamya xoang bơh git nđờ rơhiang nă cau chài tus bơh ală càr: Dăk Lăk, Gia Lai, Quảng Ngãi, Phú Thọ mờ càr Lâm Đồng. Tơl mpồl, tơl jơi bơtiàn cèng tus dơ̆ lơh chờ tàm gùng drà dùl bơta niam chài krơi is, pơgồp bal tàm broă lơh gơs pang rùp uă bơta niam chài bơh niam chài cing mồng lơgar Việt Nam bal mờ tiah Đah jum măt tơngai Lik câu Á dê.

Tus bal tàm lơh chờ, cau chài Trần Ngọc Dũng, kòn cau Thái, tus bơh càr Phú Thọ ngoh rơngăc đơs: “Gơwèt mờ să tờm añ tiah rơbô bơkào Dà Làc geh dùl bơta pa gơlơh krơi is ngan. Niam bơnĕ ngan, trồ tiah mrềt niam, kòn bơnus đềt mềr. Tìp gal ngan jơi bơtiàn krơi is, geh bal ală jơi bơtiàn bơh lơgar bơdìh, cèng tus bal ală bơta niam chài krơi is ngan. Nùs nhơm bơh kòn bơnus dê là ờ kờñ lik rê ờ”.

Ờ mìng là ngai chờ bơh ală jơi bơtiàn lơgar Việt Nam dê, lơh chờ tàm gùng drà gam là tiah tìp bal niam chài bơh ală lơgar dê. Cau chài Thong Souphoni, tus bơh càr lơgar Vientiane, lơgar Lào pà git, tus bal Lơh chờ Cing mồng tiah Đah jum măt tơngai lik câu Á nam 2025 geh càr Lâm Đồng bơyai lơh, Mpồl cau chài tus bơh lơgar tơlik nơm Rơwas cèng tus mờ ală săp dròng cing, phan soh ờs mờng bal mờ uă bơta niam krơi is ngan mờ Dà Làc – Lâm Đồng kung neh lời wơl uă nùs nhơm ngoh rơngăc ngar gơwèt mờ cau chài do dê: “Ală cau chài tus bơh lơgar Lào ngai do mbơn ồi kòn cau Lào, chèo kòn cau Lào niam bơnĕ ngan. tàm Lâm Đồng geh uă tiah lòt nhơl niam, trồ tiah den mrềt niam ngan. Geh uă bơta bơkào niam. Rài kis làng bol niam bơnĕ mờ geh uă phan sa bơkah”.

Tàm broă bơyai lơh Chờ Cing mồng tiah Đah jum măt tơngai lik câu Á nam 2025, Lơh chờ gùng drà geh bơyai lơh lòt gùt dar tơnao dà Xuân Hương – Dà Làc ờ mìng là dơ̆ nàng ràng tơlik, mờ gam là anih tơrbŏ bal pơgồp bal ală mpồl bơtiàn jơi bơtiàn, ală lơgar tàm tiah do bơh bơta niam chài cing mồng – phan lời wơl kwơ màng kòn bơnus dê. Ală săp dròng cing mpong tàm gùl Dà Làc gam lơh geh uă jơnau yal bè nùs nhơm tam klăc bal, git jơnau bal mờ prăp gàr bơta kwơ niam chài ờs mờng tàm rài kis pa.