Ea Knir Farm ơm tàm thôn Hòa Thành, sàh Ea Knuec, càr Dăk Lăk ơm ngài tiah tờm Buôn Ma Thuột mờr 10 kơi sồ. Do là tiah nac lòt nhơl jòi tus nàng geh kis tàm rài kis lơh sa suơn sre dê. Tàm hơ̆, nac lòt nhơl gơ lơh kờñ ngan mờ broă dus bơ sềt tềng mờ sa pòr iar gơm mờ bơ sềt tềng. Bi Êban Thái Ân, kòn cau Bahnar, cau tờm Ea Knir Farm pà git, bơ sềt tềng geh sền là biàng kò bơh brê bơnơm dê, gơ hòn is jat kàl, thồm, wền di mơ mờ lơngồt – dùl bơta bơkah mờ ờ geh bơ sềt lơi gơtùi ala: “Bơ sềt tềng là phan pà bơh ù tiah dê. Bol hi ờ ƀư tê, mìng lơh gơlik bơta niam ndrờm bè geh is tàm ù. Pah tŭ tus nhai bơ sềt but, nac lòt nhơl kờñ ngan lòt dus bơ sềt, tài gơ gam ris bơkah, sàng goh, cèng bơta bơkah is ồn tiah brê bơnơm dê”.

Pòr iar gơm mờ bơ sềt tềng Ea Knir Farm geh gơm jat bơta ờs mờng is ồn bơh làng bol ơm kis bơh jŏ tàm ƀòn lơgar dê: ƀuơn mơya kơrhia ngan mờ tơl bơta phan gơm. Iar geh ròng is tàm suơn farm dê. Phe gơm pòr sùm là phe mìr halà phe pơr hê tiah kơh bơnơm dê – do là dùl bơta phe lơngàm, lơ iang mờ ƀô thồm tai.

Bơta lơh pòr iar gơm mờ bơ sềt tềng tàm Ea Knir Farm gơ gơs bơkah krơi is ngan ờ mìng là bơta bơkah, mờ gam là broă nàng gơm gơs pòr do. Tàm farm, nac lòt nhơl geh sền jơh ală bơnah broă nàng gơm pòr- bơh rơ wah phan tus gơm gơs pòr bè lòt dus is bơ sềt tềng tàm ù tiah brê bơnơm mờ geh tus bal trŭ gơm. Nac lòt nhơl rơp geh pơlam  bơta chài đal git bơ sềt tềng, bơsram bơta chài dus mờ bơ sềt gơtùi but wơl. Bi Nguyễn Trọng Minh tus bơh ƀòn dờng Hồ Chí Minh pà git: “Do là dơ̆ sơn rờp añ geh dus is bơ sềt tềng. Tŭ dus tờm bơ sềt, gam gŏ ƀô ù sùh iò mờ sền ală tờm bơ sềt kò but bềng tơn, gơ lơh kờñ ngan. He dus is tơnơ̆ hơ̆ geh sa bơ sềt mờ he dus tai – gơ kờñ ngan. Añ rơp gam tus wơl ndo nàng nggui tàm àng drim gờñ halà trồ mho mang, sa bơngàn pòr duh mờ iat sap iar nrau hơ đơm jơng bơnơm, kung gơ lơh niam ngan”.

Kung bè ală anih ơm rlô să ndai, Ea Knir Farm ai gơnoar nac lòt nhơl ơm rềp bơnhă gơm, iat jơnau pơlam bè bơta chài gơm pòr, bơta chài rơ wah iar, bơta chài tĕ phan jat Tây Nguyên bơh yau. Bi Hồng Anh, nac lòt nhơl tus bơh Vũng Tàu đơs: “Añ kờñ ngan rlau jơh là geh nggui kềng bơnhă ồs, rơ hềp ƀô poac iar mờ bơ sềt tềng gơ tàm bơrlŭ bal. Nhơm kis den mrềt lơ ngờm, càl khồm mrềt, gơ lơh bè he gam kis tàm dùl tiah rềp mềr ngan, ờ di là lòt nhơl”.

Pòr iar bơ sềt tềng duh geh chŏ ơn tàm ală bơngàn geh mòn bơh ù buh. Nhŭ duh pòr dê gam nhồl, ƀô thồm bơ sềt tềng dê gơ bơrlŭ bal mờ ƀô poac iar – lơh gơlik bơta ram mhŭ is ồn ngan bơh phan sa Tây Nguyên dê. Dùl nă nac lòt nhơl tus bơh Đà Nẵng, bi Nguyễn Thị Yến đơs: “Añ neh sa uă bơta pòr iar rau, mơya pòr iar bơ sềt tềng tàm do geh bơta bơkah krơi is ngan, lơngồt dồ êt, ờ lơngàm ir, ờ nhồl ir. Ù tiah niam, phan sa den bơkah tai den tàng añ kờñ ơm wơl ndo jŏ dồ êt tai”.

Sền git bơta niam chài – phan sa mờ pòr iar bơ sềt tềng neh gơ gơs dùl tềl lời wơl krơi is ngan bơh Ea Knir Farm dê. Do ờ mìng là phan sa bơkah, geh kuơ să jan in mờ gam là dùl phan sa nùs nhơm cèng huềng ù mờ nùs nhơm kòn bơnus, đềt mềr, dòn song mờ ram mhŭ bè huềng ƀòn dê.