Jăt Sờh Niam chài, Tàp pràn să jan mờ Lòt nhơl càr Lâm Đồng yal, kờp jơh khà cau năc lòt nhơl sền, ơm di tàm dơ̆ do kờp dŭ di pơgăp 650 rơbô dơ̆, tàm hơ̆ cau năc bơh ală lơgar di pơgăp 30 rơbô dơ̆; priă geh bơh lòt nhơl kờp dŭ 1 rơb6 200 tơmàn đong. Bơta pràn ngui anih ơm geh bơh 70 tus 80%; mìng is ală hìu ơm geh bơh 3 tus 5 sơrmañ geh bơh 85 tus 90%.

Di tàm dơ̆ do, uă broă lơh niam chài pơrài bồ tơngoh geh bơyai lơh bè Countdown - Chờ gờm nam pa 2026 tàm Dà Làc, Mũi Né mờ tiah đah măt tơngai mŭt càr Lâm Đồng dê; bal mờ ală broă lơh đơs crih tamya, lơh chờ tàm ală tiah, anih lòt nhơl. Is ồn, càr Lâm Đồng bơyai lơh chờ gờm dơ̆ par sơnrờp ngan tàm nam 2026 dê, wă 200 nă cau năc, pơgồp bal tàm broă yal rùp rài anih tus niam lơngăp lơngai, đềt mềr.

Sơnđờm ai ală broă lơh Nam lòt nhơl Dà lơgar- Gia Lai nam 2026, Sờh Niam chài Tàp pràn să jan mờ Lòt nhơl càr Gia Lai pơgồp bal mờ Ƀlàng rơndeh par Phù Cát, Gah rơndeh par VietnamAirlines mờ Ală mpồl Lòt nhơl bơyai lơh wă rò ală năc sơn rờp tus mờ càr Gia Lai tàm nam pa.

Tàm dơ̆ par cèng ƀàng sồ VN1392 bơh Gah rơndeh par Vietnam Airlines neh jun 185 nă năc tus mờ Gia Lai tàm tơngai sơn rờp bồ sơnam pa 2026. Tàm ƀlàng rơndeh par tơn, năc geh wă rò mờ broă lơh tam ya đang grài hô hơng, ală jơnau gờm chờ nam pa, ală bơnah phan pà cèng bềng tềl lời wơl ƀòn lơgar dê lời ai năc in. Nam 2026, Gia Lai chờ hờp geh Ƀộ Niam chài, Tàp pràn să jan mờ Lòt nhơl rơwah drơng lơh Nam Lòt nhơl Dà lơgar, mờ jơnau kờñ yal tơngĭt uă pràn kơl dang bơta ƀuơn, bơta pràn, bơhiàn niam chài mờ ală phan bơna lòt nhơl niam ngan, pơnđơl pràn lơh ngan wă rò pơgăp 15 tơlak dơ̆ năc, priă lơh geh kờp dŭ 35 rơbô tơmàn đong.