Jat Sờh Niam chài, Tàp pràn să jan mờ Lòt nhơl càr Lâm Đồng yal, kờp jơh khà nac lòt sền, ơm wơl bic mang tàm poh sơn rờp nam 2026 dê kờp dŭ geh mờr 650 rbô dơ̆, tàm hơ̆ nac ală lơgar mờr 30 rbô dơ̆; priă lơh geh bơh lòt nhơl kờp dŭ geh mờr 1 rbô 200 tơmàn đong. Khà ơpah cơldŭ ơm kờp bal geh bơh 70 tus 80%; is ồn ală anih ơm wơl bic màng bơh 3 tus 5 sơmañ khà ơpah geh bơh 85 tus 90%.

Nàng drơng nac lòt nhơl in, càr Lâm Đồng neh lam lơh ndrờm bal ală broă lơh gàr bơta niam broă drơng ala, lơngăp lơngai rơndap tap sèng, lơngăp lơngai lòt rê tàm gùng, gàr kloh niam tiah ơm kis mờ kloh niam ờdo ờdă phan sa. Ală anih kă bro gah lòt nhơl lơh jat nền nòn broă lir mờ tac di giă, ờ lời gơlik geh bơta tơguh giă, pơhìn, lơh gơlik tiah lòt nhơl niam chài, đềt mềr.

Dà Làc pơn jat tai là anih tus geh uă hìu bơnhă sac rơ wah. Bi Lê Văn Trọng, nac lòt nhơl tus bơh càr Dăk Lăk đơs: “Gơtùi sền gŏ bơta sơrmah sơrmài, đềt mềr, kờñ ngan bơh anih sàu sa, anih ơm rlô tus ală ù tiah niam tiơng pơn rơ ndrờm geh yal tơnggit niam lơm. Tŭ tus mờ suơn bơkàu do den he gam gơtùi sền gŏ bơta tam gơl pa bvơh càr Lâm Đồng pa dê, bơta tam gơl pa bơh dà lơgar dê tŭ mut tàm nam 2026”.

Tàm tŭ hơ̆, tiah đah mat tơngai lik càr Lâm Đồng kung cih dờp khà nac lòt nhơl gơguh uă. Bi Nguyễn Thành Công, nac lòt nhơl tus bơh ƀòn dờng Hồ Chí Minh pà git: “Añ rơ wah Phan Thiết mờ Mũi Né là anih tus lòt nhơl. Añ lòt Suối Tiên, kuơ̆ gơlang ơlak vang, đì rơndeh jeep, đì rơkì.. mờ lời tŭ tơngai nàng ơm rlô să. Dơ̆ lòt nhơl bồ nam do añ kờñ lòt sền ù tiah brê bơnơm”.

Di dơ̆ do, uă broă lơh niam chài – lơh prài bồ tơngoh geh bơyai lơh bè Kờp sơ lơŭ wơl (Countdown) – gờm chờ wă rò nam pa 2026 tàm Dà Làc, Mũi Né mờ tiah đah mat tơngai mut càr Lâm Đồng; bal mờ ală broă lơh đơs crih tamya, lơh chờ tàm ală tiah, ală anih lòt nhơl. Is ồn Lâm Đồng bơyai lơh wă rò dơ̆ par sơn rờp nam 2026 dê, rò mờr 200 nă nac lòt nhơl, pơgồp bơnah yal tơnggit rùp să anih tus niam ờdo ờdă mờ đềt mềr, sơrmah sơrmài.

Kơnờm rơcang nền nòn, wil tơl, càr Lâm Đồng tàm dơ̆ ơm rlô sa tềp Tây 2026 neh drơng niam jơnau kờñ lòt sền, ơm rlô să bơh nac lòt nhơl dê. Bơh bơta sơn đờm do, Lâm Đồng tơlik jơnau kờñ wă rlau 25 tơlak dơ̆ nac tàm nam 2026, đơs nền gơnoar broă anih tus lòt nhơl niam ngan khà dùl dà lơgar.