Jat Sờh Niam chài, Tàp pràn să jan mờ Lòt nhơl càr Lâm Đồng, tàm 4 ngai ơm rlô (bơh ngai 30/4 tus ngai 01/5), jơh gùt càr kờp dŭ wă mờr 620 rbô dơ̆ nac lòt nhơl, gơguh 21% pơndrờm bal dùl tŭ mờ nam lài; tàm hơ̆ khà nac ală lơgar geh mờr 21 rbô dơ̆. Kờp jơh priă lơh geh mờr 1 rbô 420 tơmàn đong. Khà nac gơguh uă bơh chờm dơ̆ ơm rlô tơn, uă tiah, uă anih lòt nhơl mờ anih ơpah ơm wơl bic mang drơng broă jơh bơta pràn tơl.

Khà ơpah cơldŭ kờp bal geh bơh 70 tus 80%, mìng is hìu nac ơpah bơh 3 tus 5 sơmañ geh bơh 85 tus 96%, geh tŭ geh ơpah jơh tơn. Ală tiah, ală mpồl lơh sa kă bro lòt nhơl rơcang lài lơh niam broă drơng ala, lơh li la phan bơna; broă lơh gàr niam lơngap lơngai, tiah ơm kis, lir loh làng giă geh lơh ndrờm bal, giă geh gàr kơ̆. Bơh hơ̆, pơn jat tai ai gŏ bơta gơ hòi gơ jà bơh lòt nhơl Lâm Đồng dê, wèt tus bơtàu tơnguh kơ̆ kơljap jŏ jòng sùm mờ tơnguh bơta niam broă drơng ala.

Jăt Sờh Niam chài, Tàp pràn să jan mờ Lòt nhơl càr Dăk Lăk yal, tàm 4 ngai ơm rơlô ngai 30 nhai 4 mờ ngai 01 nhai 5, priă geh bơh lòt nhơl càr dê geh 347 tơmàn đong, gơguh mờr 19% pơn ndrờm mờ nam 2025.

Cồng nha do tus bơh broă lơh geh cồng nha ală broă hòi jà, pơgồp bal mờ mpồl broă lơh niam chài lòt nhơl niam bơnĕ krơi is. Pơnrơ ngan geh ală broă lơh bè tơnpar plai ƀluh dờng gùt dar gơng Nghinh Phong, sơnah ƀòn Tuy Hoà, ha là iăt sền bơta niam chài kòn cau Rơđê, bơta niam chài rài yau, niam chài cing mồng, phan sa ờs mờng mờ lơh phan sa bơh ka ngừ dà lềng dờng… pơgồp bal ai geh bơta gơhòi gơjà ai anih tus càr Dăk Lăk in.