Pa do, làng bol kòn cau Jarai tàm ƀòn Kép 1, sàh Ia Ly, càr Gia Lai neh bơyai lơh sơn đờm ngui hìu rông pa, tàm nùs nhơm hô hơng, chờ hờp bơh sap ntas cing mồng dê. Làng bol tiah do pơn yờ să ngan mờ hìu rông jơnhua, mpờl gŏ niam ngan tàm nggùl suơn kơphe gơs tơlir dê. Dơ̆ lơh yàng gờm chờ hìu rông pa geh bơyai lơh jat bơhiàn bơh yau cau Jarai dê, tàm hơ̆ geh dơ̆ lơh yàng sa rơpu. Đơng lam càr Gia Lai, gal ngan nac dờng màng neh rê chờ hờp bal mờ làng bol ƀòn Kép 1. Cau bơceh jơnau đơs crih mò Linh nga Niê Kđăm – cau kơlôi sơnơng niam chài bơh yau Tây Nguyên dê đơs: “Añ neh geh iat ală sap ntas niam ngan bơh cing cau Jarai dê. Hơ̆ là ală sap cing geh dròng mờ bơta chờ hờp ngan. Hiòng niam chài kung gam gơ hòr sùm tàm nùs tồr làng bol ƀòn Kép 1 dê. Hơ̆ là bơta kuơmàng ngan, mìng kờñ geh sap, geh anih, là he neh gơtùi lơh kis wơl hiòng niam chài kuơmàng hơ̆. Bơh niam chài phan sa tus hìu ơm, hìu ƀồc… tus ală dơ̆ lơh chờ. Hơ̆ là ală bơta pal ki ngàm ngan”.

Hìu rông ƀòn Kép 1 gơ wèt rơndap broă lơh bơt bơtàu phan bơna lòt nhơl mpồl bơtiàn sàh Ia Ly, càr Gia Lai geh kờp jơh priă bơcri rlau 12 tơmàn đong, mờ uă bơnah broă, tàm hơ̆ hìu rơng, suơn rùp wac mòn hìu ƀồc, dà mbòr, gùng lòt mờ ală ƀòn rềp bal. Tàm do, nac lòt nhơl lòt sền anih ràng tơlik ală phan lời kis niam chài, kah yau, sền git niam chài bơh jŏ tiah do. Oh Khanh – cau bơsram dờng Gah lòt nhơl, Hìu bơsram Kao đẳng Gia Lai rê tàp lơh broă tàm ƀòn mờ gơnoar là cau pơlam lòt nhơl yal: “Oh yal tơnggit nac lòt nhơl in git bè niam chài bơh yau cau Jarai dê niam krơi is ngan. Oh lam nac lòt sền dà mbòr, sền oh mi cau ùr kòn cau Jarai lòt bơ̆ dà, yal nac in git rùp să ùr Jarai git tàñ ồi kòn cau, cau klau den git tàñ sơ̆, kơldung, nir, bơka rùp phan tàñ in. Tŭ rơ wah cau nàng kup bau, cau klau rơp sền tàm lềng dà bơñà mờ blah ồi kòn cau geh rùp bơka niam den khi rơp bau. Ală ùr ơruh sền cau klau geh mpàng tê chài rơgơi tàñ sơ̆ bơka niam, tàñ nir niam den hơ̆ ngan là cau jak chài nàng bau. Bơdìh hơ̆ tai, oh kung kờñ pơlam nac lòt nhơl git uă rlau tai bè rài kis rài yau bơh làng bol kòn cau Jarai dê”.

Ƀòn Kép 1, sàh Ia Ly, càr Gia Lai là tiah nac lòt nhơl gơtùi sền gŏ bơta niam chài krơi is bơh cau Jarai dê. Mò Rcom Xuân – lam bồ Mpồl cau ùr ƀòn Kep 1 pà git, bơh bồ nam 2026, ƀòn neh rề ơnàng tai 2, 3 broă lơh sền git jat gùng dà jòi git bè niam chài kòn cau Jarai. Nac lòt nhơl ờ mìng tus hìu rông nàng sền ală phan ràng tơlik, mờ gam tus tơl hìu làng bol nàng sền ală broă lơh sa, tus bal trŭ gơm phan sa ờs mờng cau Jarai dê: “Nac lòt sền khi rơp yal lài ală phan sa ờs mờng, bol hi jàu kơnòl tơl nă cau in trŭ gơm phan sa. Nac lòt nhơl là ală cau bơh ngài tus nhơl, bol hi wă rò sơrmah sơrmài, yal tơnggit nac in bè ƀòn lơgar, bè bơhiàn bơh yau, bè rài kis bơh làng bol dê. Kơnờm bơh ală nac lòt nhơl làm gùt ală tiah cèng wơl priă jền lơh geh ai oh mi cau ùr lơh lòt nhơl in, pơgồp mờ tac phan lòt nhơl ndai kung geh priă sơl. Nac lòt sền tơn dơ̆ lơh yàng hìu ƀồc, halà sền bơhiàn ies tơp ƀồc, dròng cing, tamya xoang, lơh mìr, sĕ còp lŏ sre, pik biap nàng gơm phan sa bal mờ gơp. Bơh ală broă hơ̆ sền gŏ nac chờ hờp ngan, kờñ ngan, bol hi kung gŏ niam nùs sơl”.

Ơm ngài ƀòn Kép 1, sàh Ia Ly mờr 15 kơi sồ tàm Gùng càr 661 là tus ƀòn Mrông Yố 1, sàh Ia Phí, càr Gia Lai. Tàm ù tiah ring lơngai, ngềt ngơt bơh ƀòn lơgar dê, nac lòt nhơl klo sap uh kơmbuat Bró Dung bơh cau chài – kra ƀòn ồng Rơ Châm Nha dê mờ ală jơnau yal niam ngan bè niam chài krơi is cau Jarai dê. Mờr 85 sơnam, bồ tơngoh gam mo ngac ngar ồng Rơ Châm Nha ờ mìng mòn, nhơl đờng goòng kòn cau mờ ồng gam yal yau ai làng bol tàm ƀòn mờ nac lòt nhơl in iat tai: “Tŭ do, bơta kuơ niam chài là phan lòt nhơl, den tàng pah tŭ nac lòt nhơl tus là he wă rò, bơyai lơh, drơng lơh nàng nac in git, sền rài kis rài yau bơh cau Jarai dê bè lơi. Niam chài krơi is bơh cau Jarai bol hi dê bè cing, ală bơta đờng goòng, kơl wào nàng uh, lơh nac in sền. geh cing, geh kơmbuat Bró Amâm, Bró Ót, Bró Dung, Ting ning, Đing Glơih… Nac lòt nhơl tus, bol hi wă rò, rơndap tap sèng tơl ală bơta, jà ñô sa, hơ̆ sồng geh lơh nac in sền, yal mat ală bơta đờng goòng kòn cau, geh tŭ nac đòm jat, nhơl bal mờ bol hi tơn”.

Cau Jarai tàm ƀòn Mrông Yố 1, sàh Ia Phí gam prap gàr ală hìu rơng bơh yau. Uă hìu bơnhă gam gàr bè ờs broă tàñ ồi kòn cau mờ jơh nùs tus bal broă lơh niam chài cing mồng tai. Ală tŭ ru broă suơn sre, cau ùr tàm ƀòn nggui kềng bơr nơ̆ tàñ, mòn gơs ală rùp bơka gơ jat bal mờ rài kis, mờ bơta pin dờn khi dê. Ai cau klau tàm ƀòn kung gam gàr sùm broă tàñ phan gle đơr bơh yau, trah mòn rùp dơm chi mờ bơto wơl cau kơnòm să in. Mò Rơ Châm H’Ken – Phó Kwang lam bồ Cơldŭ lơh broă Đảng ủy sàh Ia Phí, càr Gia Lai at kơnòl Lam bồ Jơnum lòt nhơl mpồl bơtiàn Ia Phí, mờ kung là cau kong kơnòl tờm Mpồl tàñ ồi kòn cau ƀòn Mrông Yố 1 pà git: “Làng bol tùc tam, geh kòi phe, geh biap kơnuh, plai chi là ală phan lơh gơs bơh suơn sre sàng goh nàng drơng nac lòt nhơl in sàu sa halà nac blơi cèng rê lơh phan pà. Phan niam chài là broă tàñ phan gle đơr mòn gơs ală sơ̆ bơkàu, nir, đồng bơh yau bơh mpàng tê cau klau dê mòn gơs. Ai ală blah ồi, kơldung triau kòn cau bơh oh mi cau ùr dê tàñ gơs tàm hìu mờ tàm Jơnum lòt nhơl mpồl bơtiàn bơh ƀòn dê. Kơnờm nac lòt sền lòt nhơl mpồl bơtiàn hơ̆, oh mi cau ùr geh tai priă jền mờ tam bal bơta kuơ gơp in. Bơdìh hơ̆ tai, gam geh mpồl drơng lơh ală phan sa ờs mờng, mpồl cing mồng – tamya xoang tìp mat lơh kwèng mờ nac lòt nhơl ndrờm lơh geh priă jền lơm”.

Bơh ù tiah cing mồng, hìu rông tus broă tàñ ồi kòn cau, tàñ phen gle đơr mờ ală dơ̆ lơh chờ bơh yau, phan lời wơl niam chài bơh cau Jarai dê gam geh lơh kis wơl, lơh niam gơ gơs ală phan lòt nhơl mpồl bơtiàn krơi is. Ờ mìng ơm wơl tàm broă lơh jat ală broă lơh bơh Nam lòt nhơl Dà lơgar tàm Gia Lai dê, broă lơh do gam lơh gơlik broă lơh sa kơnhăp jŏ, kơ̆ kơljap ai làng bol in, tŭ să tờm khi gơ gơs là cau tờm sền gàr, yal tơnggit mờ ngui bơta kuơ niam chài he dê.