Tềng tiah mƀur ală tờm chi tàm ƀlàng hìu pơrjum mpồl bơtiàn ƀòn Ky, sơnah ƀòn Thành Nhất, càr Dăk Lăk, să wài nrao nàng hòi trồ mìu. Bơh àng drim gờñ, cau tàm ƀòn neh pơs wàs kloh tàm bă ù ơnàng nàng rơcang lơh yàng, ală cau tơrgùm dròng cing, tamya xoang.

Tus tŭ lơh yàng, ală broă neh geh rơcang lài jơh sir, làng bol tàm ƀòn tàm să soh phan ờs mờng, tơrgùm bal tềng đăp hìu pơrjum ƀòn. Săp drìng cing mpong, broă lơh yàng geh sơn đờm lơh. Lơh yàng geh bàr bơnah: răc dan kờñ geh trồ mìu mờ duh khoai kờñ geh bơta pràn kơl dang să jan ai cau kra ƀòn in. Cau lơh yàng lơh ală broă lơh ờs mờng, răc dan tus mờ yàng, răc dan kờñ geh trồ mìu tus, kàl lơh sa geh hòn gơs niam.

Ồng Y Bang Byă, cau geh lơh yàng kờñ geh bơta pràn kơl dang să jan tàm broă lơh yàng do pà git, duh khoai kờñ geh bơta pràn kơl dang să jan ờ gơtùi ờ geh tàm ală broă lơh yàng kòn cau Rơđê dê, răc dan nàng ală cau geh măt tàm mpồl lơh yàng bal mờ ală cau tus sền in geh bơta pràn, tìp bơtoah mờ pràn kơl dang. “Ngai do là ngai lơh yàng răc dan kờñ geh trồ mìu, kung là ngai lơh yàng kờñ geh bơta pràn nàng ală kra ƀòn in. Hơ̆ là bơta bơtoah ai să tờm añ in, kơ̆p kờñ geh bơta pràn kơl dang nàng nam tus lơh wơl niam rơlao broă lơh yàng krơi is jơi bơtiàn dê, drơng broă wă làng bol niam rơlao”.

Tơnơ̆ mờ bơnah lơh yàng duh khoai, ală broă lơh bè lơh geh wơl broă lơh sa geh bơyai lơh bơh broă tam kòi tus mờ broă lòt ting phan brê. Rùp rài “trồ mìu” geh lơh tơn tàm dơ̆ lơh yàng bè dùl jơnau kơ̆p kờñ ai kàl lơh sa pa in geh mìu nhàc niam, phan tam hòn gơs niam, kàl lơh sa geh tơnhào uă.

Broă lơh yàng tơn jơh, bơnah broă lơh chờ pơn jăt tai mờ broă tìp bal đơs crih tamya, sa phan, ñô tơrnờm mờ sào sa mpồl bơtiàn. Nùs nhơm ƀòn lơgar geh chờ hờp rơlao, tam klăc bal rơlao. Lŏ H’ Zêna Byă, cau kis tàm ƀòn tơlik nùs nhơm chờ: “Ngai do là dùl ngai chờ hờp ngan. Tàm nùs nhơm chờ hờp do bal mờ ală jơnau tamya, bal mờ săp dròng cing geh bal niam ngan. tàm rài pa bơtàu tơnguh măi mok bè tŭ do dê, mờ ală gùng đơs crih tamya krơi is, den bơhiàn bơh kòn cau Rơđê dê pal geh prăp gàr nàng ală rơnàng tơnơ̆ do in tai”.

Tàm nùs nhơm chờ hờp bơh broă lơh yàng, cau năc tàm lơgar mờ ală lơgar kung ƀuơn ngan sơl tus bal jăt mờ ală săp tamya xoang, săp dròng cing bal mờ bơta bơkah bơh dà tơrnờm ƀòn lơgar dê. Lơh yàng duh khoai ờ gam mìng lơh geh dùl broă dùl broă lơh yàng bơh is làng bol tàm ƀòn dê tai, mờ neh gơs bơta pờ ơàng nàng làng bol bal mờ cau năc in tus bal nền nòn rơlao tàm rài kis niam chài kòn cau Rơđê dê.

Ồng Antonie, cau năc lòt nhơl tus bơh lơgar Tây geh tus bal tàm dơ̆ lơh yàng duh khoai kờñ geh trồ mìu tàm ƀòn Ky di tàm dơ̆ do. Ală săp dròng cing, rùp să phan soh ờs mờng kòn cau dê bal mờ nùs nhơm pơgồp bal mpồl bơtiàn neh cèng geh ồng in dùl dơ̆ tus bal. “Añ kơlôi là dùl broă lơh yàng niam bơnĕ ngan. Añ neh iăt uă jơnau đơs crih niam ngan, uă dơ̆ tamya krơi is ngan, làng bol soh tàm să ală phan soh krơi is ngan. Añ kơlôi là cau Rơđê tàm do niam bơnĕ ngan. Añ gơlơh gơboh ngan mờ broă lơh chờ do”.

Mờr jơ̆t nam do, lơh yàng răc dan kờñ geh mìu geh lơh wơl mờ bơyai lơh pah nam tàm ƀòn Ky tàm lồi nhai pe ha là nhai poan. Tàm pơn jăt rài kis pa, nàng geh sùm broă lơh yàng do là broă lơh ngan bơh mpồl bơtiàn bal mờ gơnoar atbồ ƀòn lơgar.

Tơn jơh broă lơh yàng, săp dròng cing gam mpong săp sùm bal mờ bơkah dà tơrnờm gam sùm, Lơh yàng răc dan duh khoai yàng kờñ geh trồ mìu tàm ƀòn Ky ờ mìng ai geh nùs nhơm kơ̆p kờñ geh trồ mìu nhàc niam, mờ gam kah tus bè rài lài do niam chài kòn cau Rơđê dê. Tàm rài kis tŭ do, săp dròng cing tàm ƀòn Ky ờ mìng hìu trồ mìu mờ gam hòi rê rài lài do bơh ƀòn lơgar dê.