Tàm Kông ty kong kơnòl nă să is Bơcri priă bơt bơtàu hìu đam Thái Bình, sơnĕ Quy nhơn – mpồl ngui mờr 30 nơm rơndeh đèng lòt nhơl tàm Quy nhơn, broă lơh sền wơl, lơh niam wơl geh lam lơh dồ dơ̆ lĕ bal. Ồng Hồ Thanh Khiết, Kwang lam bồ Kông ty pà git, jơh ală rơndeh rơndồ ndrờm geh sền sơ wì nền ngan nàng kờñ di tŭ git gŏ, lơh niam wơl, gàr tơl jơnau sồr niam ờdo ờdă lài mờ tŭ drơng nac lòt nhơl in:

“Kông ty neh lơh 1 mpồl lơh niam wơl krơi is đah lơh niam wơl mờ jơh ală oh mi. Tŭ rơndeh ờ niam bơta lơi den yal mơ nàng kông ty sồr đah lơh niam wơl nàng bơsong mơ tơn tàm ngai. Dilah lơh niam wơl ờ gơtùi den ờ ngui tai rơndeh hơ̆ mờ ai rơndeh ndai ala. Bơta kơnhăp kơ̆ rơndeh dê den sùm sền sơ wì bơta àng, thăng rơndeh là 2 bơta kuơmàng ngan rlau jơh tàm bơta kơnhăp kơ̆ rơndeh dê”.

Tàm ală mpồl jun pơndiang dờng, broă lơh jat broă rơndap lơh sền sơ wì măi mok rơndeh đèng kung geh lơh jat nền nòn. Ồng Lê Hùng Thịnh, Phó Kwang lam bồ sơnĕ Kong ty bơcri priă bal Sun Taxi tàm Bình Định pà git, broă sền sơ wì rơndeh rơndồ geh lam lơh pah ngai mờ lơh niam jat tơngai pơrgon jat jơnau sồr:

“Tàm tŭ drơng nac in pah ngai, tŭ oh mi lòt jàu dơ̆ lơh broă, dờp rơndeh den ndrờm geh mpồl sền sơ wì măi mok, mpồl đơng lam sền rơndeh. Gơ wèt mờ broă lơh niam wơl jat tơngai pơrgon den rơndeh rơndồ sùm geh lơh niam wơl thăng rơndeh, măi mok nàng măi rơndeh mờ ală bơta măi mok ndai. Mpồl drơng broă sùm lơh broă ngai mang nàng di tŭ bơsong ală bơta ờ niam nàng gàr kơnhăp kơ̆ rơndeh in”.

Gơ wèt mờ mpồl cau măi rơndeh, broă gàr niam ờdo ờdă ai nac in sùm là broă lài ngan. Bi Phan Tấn Duy, dùl nă cau măi rơndeh đèng lòt nhơl yal, lài mờ tŭ lik bơh anih rơndeh ơm, cau măi rơndeh pal sền sơ wì jơh măi mok mờ tơngkah nac đì rơndeh lơh jat jơnau sồr lơngăp lơngai. Bi pà git:

“Lài mờ tŭ măi rơndeh den he pal sền sơ wì wơl jơh đèng, kong rơndeh; dilah gàr kơnhăp kơ̆ den hơ̆ sồng măi rơndeh. Tàm tŭ măi den sùm tơngkah nac đì rơndeh pal kơt che gàr kơ̆, nggui niam tàm rơndeh kung bè bañ pơndiang gal uă ir cau nàng gàr niam lơngap lơngai lòt rê”.

Tŭ do, tàm càr Gia Lai geh 3 mpồl lơh sa kă bro lơh broă drơng ala rơndeh đèng lòt nhơl, kờp jơh geh 119 nơm rơndeh. Bơh sền sơ wì anih lơh broă geh gơnoar dê, ală mpồl lơh sa kă bro ndrờm geh lơh sră ai lơh broă mờ rơndeh rơndồ geh tơl ală bơta jat jơnau sồr bè kơnhăp kơ̆ măi mok. Broă rơcang lài sền wơl, lơh niam wơl rơndeh ờ mìng pơgồp bơnah gàr niam ờdo ờdă ai nac lòt nhơl in mờ gam tơnguh bơta niam broă drơng ala, lơh gơlik rùp hin rềp mềr, mờng chài ai lòt nhơl ƀòn Dà Lềng Quy Nhơn in tàm tơngai lòt nhơl uă mờr tus.