Ngai chờ geh lơh tàm 2 ngai, 12 mờ 13 nhai 4 mờ bơta tus bal bơh rlau 800 nă cau chài, làng bol ală jơi bơtiàn tus bơh 17 kơnhoàl, ƀòn drà dờng, ƀòn dờng tàm càr Gia Lai dê. Mờ tơngume “Mpong ntas ù tiah kơh bơnơm dờng ơning ơnàng”, broă mut lơh geh sơn đờm mờ bơhiàn lơh wơl rùp hin mpồl bơtiàn ală kòn cau bal mờ gơp bơ tòm tơrgùm rê hờ “hìu bal” – là tiah bơrlŭ bal bơta niam chài, tàm bơrkuăt bơta pin dờn, bal mờ gơp wèt tus jơnau kờñ bơt bơtàu càr Gia Lai pas sơm, niam bơnĕ, tam klac mờ bơtàu tơnguh kơ̆ kơljap jŏ jòng sùm. Pơn jat hơ̆ là broă lơh đơs crih tamya mờ ală jơnau dròng cing jañ mồng ai tơnggŏ niam ngan rài kis niam chài ờs mờng, bơta kơp kơnờm brồ guh bơh làng bol ală jơi bơtiàn dê.

Tơnơ̆ mang sơn đờm mut lơh chờ, ală mpồl cau chài neh lơh wơl uă bơhiàn lơh yàng, lơh chờ, ală bơhiàn tiơng pơn rơ bè dơ̆ lơh yàng rò dà rê tàm ƀòn, sa rơpu, lơh yàng ưn ngài, lơh yàng Sơmă Kơcham, niam chài đơs tuồng, teh đờng goòng kòn cau, trah mòn rùp dơm chi, tàñ phan gle đơr, tàñ ồi kòn cau. Mò Lê Thị Thanh Thủy – Kwang lam bồ Anih tờm Niam chài – yal tơnggit jơnau mờ Tàp pràn să jan kơnhoàl Mang Yang, càr Gia Lai pà git: “Mang Yang cèng tus ngai chờ ală bơta lơi niam ngan rlau jơh. Bơdìh hơ̆ tai, añ kơp kờñ ngai chờ geh pơn jat tai lơh sùm nàng gơtùi gàr ală bơta niam chài bơh cau Bahnar mờ ală jơi bơtiàn ndai dê tàm càr”.

Nam do, mpồl cau chài ƀòn drà dờng Ayun Pa geh 46 nă cau tus bal tàm uă tơngume niam ngan bè dròng cing jañ mồng, tàñ ồi kòn cau, tus bal ală bơta nhơl ñŏ bơh yau… Cau chài Nay Ka ơm tàm ƀòn Phu Ama Nhuer 2, sàh Ia Rtô, ƀòn drà dờng Ayun Pa đơs: “Mpồl cau chài ƀòn drà dờng Ayun Pa bol hi rơp lơh wơl bơhiàn lơh pơthi – dùl bơhiàn bơh yau krơi is ngan làng bol kòn cau Jrai dê. Do là bơhiàn duh khoai huềng cau neh sang rài bơh kòn cai Jrai Cheo Reo dê. Broă lơh wơl bơhiàn lơh yàng do nàng kờñ ai tơnggŏ wơl bơta niam chài krơi is kòn cau Jrai dê, tơngkah rài kơnòm să in git mờ ki ngàm ală bơta kuơ niam chài bơh yau bèp ồng dê”.

Cau chài Siu Thưm ơm tàm ƀòn Ku Roh, ƀòn dờng Pleiku pà git, mpồl đơs crih tamya thôn dê geh 40 nă cau chài rơp dròng ală jơnau cing chờ hờp ngan bè ‘Gờm chờ pha lin” bal mờ ală gùng đơs pơnđik cèng bơta niam chài krơi is. Do là tŭ nàng yal tơnggit tus nac lòt nhơl in git ală bơta kuơ niam chài krơi is kòn cau he dê: “Dơ̆ do ờ di là tàm pơrlòng mờ ală mpồl ndai mờ là tìp mat lơh kwèng. Bè hơ̆ den tàng, bol hi kờñ cèng tus ală jơnau bơyai lơh niam ngan rlau jơh bơh cau Jrai tàm Pleiku dê nàng yal tơnggit mờ ală mpồl ndai mờ nac lòt nhơl in tus Gia Lai. Bè hơ̆ den tàng cau chài ndrờm chờ hờp mờ jơh nùs ngan”.

Ù tiah ngai chờ lip rơlìl bơta niam chài mờ ală broă lơh bè lơh wơl pơrjum ƀòn, ràng tơlik phan soh, gùng đơs crih, phan sa ờs mờng mờ ală bơta nhơl ñŏ bơh yau, ală anih ràng phan bơkah tiơng pơn rơ càr dê bè kơphe, tơrnờm, piang prùh tàm ding đơr, poac buh,…. Pơgồp bơnah yal tơnggit bơta li la mờ bơta niam chài bơh làng bol ală kòn cau tàm càr dê.