Tàm pe ngai ơm rlô Ngai duh kah Bơtau Hùng, lòt nhơl Lâm Đồng dê cih dờp khà nac gơguh uă ngan, uă anih ơpah ơm wơl neh geh ơpah jơh, ală broă lơh niam chài – lòt nhơl geh lơh duh hồl. Bơh ngai 25 tus ngai 27/4, càr Lâm Đồng wă mờr 350 rbô dơ̆ nac lòt sền, ơm wơl bic mang, tàm hơ̆ geh 14 rbô dơ̆ nac ală lơgar, kờp jơh pria wlơh geh mờr 768 tơmàn đong. Khà cơldŭ ơpah kờp bal geh bơh 65 tus 75%, is ồn hìu nac ơpah bơh 3 tus 5 sơmañ geh bơh 80 tus 95%.

Jat Sờh Niam chài, Tàp pràn să jan mờ Lòt nhơl càr Lâm Đồng, kơnờm rơcang lài bơh gờñ den tàng bơta lơngăp lơngai, rơndap tap sèng, lơngăp lơngai lòt rê tàm gùng, rơcang lài kơryan mờ crùh ồs sa mờ kloh niam ờdo ờdă phan sa tàm ală tiah, ală anih lòt nhơl geh gàr niam; giă broă drơng ala, is ồn là giă  ơpah ơdŭ ơm wơl bic mang sền gàr geh gàr bè ờs, ờ gơlik geh bơta bơklơn giă, tơnguh giă, dŏ jà nac. Tàm dơ̆ ơm rlô chờ 3 ngai, uă broă lơh niam chài – lòt nhơl bè bơhiàn duh khoai, lòt tàm gùng, bơyai lơh đơs crih tamya, nhơl ñŏ bơh yau… geh bơyai lơh, lơh gơlik bơta tờm gơ hòi gơ jac nac lòt nhơl, pơgồp bơnah tơn jŏ tŭ tơngai ơm wơl bic mang mờ tơnguh broă tă dơ̆ ngui.