Dơ̆ Duh kah Bơtau Hùng, ngai rlô 30/4-1/5 mờ uă ngan tơngai kàl prang nam 2026, mpồl năc mpồl mờ năc hìu bơnhă tus mờ càr Lâm Đồng kờp dŭ lài gơguh pràn. Nàng wă rò mpồl năc uă ngan do, bơdìh mờ ală broă lơh gơ hòi gơ jà, uă anih ơm kis ing mờ tiah tus sền gĭt jơh nùs tơnguh bơta niam drơng broă, gàr niam cồng nha drơng broă tàm tơngai uă ngan do. Mò Nguyễn Thị Mai Trâm, Dong broă Kwang atbồ dờng Muine Bay Resort (Phan Thiết) pà gĭt, mpồl lơh broă neh tơlik mat uă broă lơh pa: “Dà lềng gam mut tàm kàl niam ngan rlau jơh. Tàm Hòn Lao, năc gơtùi sền gĭt drơng broă plung dŭi lòt song tus bồt nàng ñơ̆p sền nhơ̆t dà lềng mờ was SUP. Tiah do geh sềm, klàng kò par rê lơh rơsòn den tàng năc rơ̆p sền gŏ tơn mờ mat, mơkung sền gĭt ñơ̆p sền mpồl ka mờ sền ală ñhơ̆t dà lềng”.

Mò Đinh Ngọc Khánh Vy, lơh broă cơl dŭ Kă bro TTC World – Thung lũng Tình yêu (Dà Làc) yal, bơh bồ nam 2026, mpồl lơh broă neh ai ngui 2 phan bơna pa là gùng ntiar nhơ̆t mờ gùng ntiar ờ geh ñhơ̆t. Ală bơta do tàm tơrbŏ bal mờ rbàng krơh Ngàn Thông tơrbŏ bal mờ dòr bơnơm Mộng Mơ mờ Thung lũng Tình yêu, cèng wơl bơta sền gĭt niam ngan ai năc lòt nhơl in: “Tàm dơ̆ ơm rlô dà lơgar ngai 30/4 mờ ngai 1/5, bol añ kơ̆p kờñ rơ̆p wă pơgăp 25 rơbô dơ̆ năc, kờp dŭ gơguh tai 123%  pơndrờm dùl tŭ bal mờ nam lài. Bol añ pin dờn tài tàm tơngai dơ̆ ơm rlô mờr tus rơ̆p tơlik mat tai ală phan bơna sền gĭt lời is ai năc kơnòm să, hìu bơnhă mờ kơnòm dềt in”.

Gah lòt nhơl càr Lâm Đồng gam lơh pràn dơ̆ lòt nhơl gùng ù gờl mờ dơ̆ lòt nhơl tàm tơrbŏ bal ală tiah tàm tơngai ƀlàng rơndeh par Liang Khàng til mpồng ing nàng lơh niam wơl. Ndrờm mờ hơ̆, càr tơnguh yal tơngĭt uă tàm internet mờ bơt bơtàu sră wăc sềr rùp lòt nhơl nàng kờñ lơh uă ngan rlau jơh broă jòi gĭt mờ jơnau yal ai năc lòt nhơl in. 

Jat ồng Nguyễn Văn Hùng, Phó Củ tịc Mpồl Lòt nhơl càr Lâm Đồng, càr rơ̆p bơyai lơh dồ ròt broă lơh dờng bè: Nhai Lòt nhơl, Festival Bơkào. Mìng is gơwèt mờ năc lòt nhơl ală lơgar tus mờ Dà Làc, ală mpồl lơh broă lòt nhơl rơ̆p bơyai lơh wă rò năc bơh tàm ƀlàng rơndeh par Cam Ranh: “Pa do, tàm pơrjum mpồl lơh broă lòt nhơl mờ bơta tus bal bơh ală càr, jơh ală ndrờm dồ nùs bal kờñ mờ lòt nhơl càr Lâm Đồng mờ ƀòn dờng Dà Làc (yau). Ala tài bơh ntrờn mhar mờ rơndeh par bè lài do, tŭ do năc lòt nhơl gơtùi sền gĭt gùng rơndeh lòt mhar halà ală gùng lòt tơlir. Bol añ neh ai ală tiah ơm rlô wă rò, lơh geh bơta tờm gùng lòt bơh năc lòt nhơl ờ gơtìp ờ gơ dan”.

Bơta rcang lài do geh lơh tàm dùl tơngume gơguh tai kơnhăp kơ̆. Qúy I nam 2026, lòt nhơl càr Lâm Đồng wă pơgăp 6 tơlak dơ̆ năc, gơguh rlau 20% pơndrờm dùl tŭ bal mờ nam lài. Is ồn, năc ală lơgar bơtàu tơnguh wơl niam neh tă pơgồp kwơ màng tàm bơta bơtàu tơnguh bơh tiah drơng broă mờ lòt nhơl ală tiah dê.

Pal sền gròi, tơnơ̆ tŭ tơmŭt bal, càr Lâm Đồng tŭ do geh ù tiah brê bơnơm li la, geh pơn yơu là “Đăng trồ lòt nhơl” tơrgùm tơl “bơnơm jơnhoa- tơnau dà ơnàng- dà lềng tơlir – bồt niam” tơnguh bơta pràn hơ hòi gơ jà pràn kơl dang mờ năc lòt nhơl tàm lơgar mờ lơgar bơdìh. Ồng Đinh Văn Tuấn, Phó Củ tịc Anih duh broă Làng bol càr Lâm Đồng đơs sùm: “Càr Lâm Đồng geh uă ngan bơta ƀuơn mờ bơhiàn niam chài is, pơrgon là tiah tus pa ngan ai năc lòt nhơl tàm lơgar mờ lơgar bơdìh in. Broă ƀlàng rơndeh par Liang Khàng til mpồng ing nàng lơh niam wơl là dùl bơta kal ke, mơya bol he gơtùi lơm lơh bơta lòng do gơ gơs tŭ tơngai niam. Do là dơ̆ nàng yal tơngĭt ală gơl gùng ù gờl pa, cèng tus ai năc lòt nhơl in ală sền gĭt krơi is bè ù tiah dờng ơnàng bơh càr Lâm Đồng dê”.

Mờ ală phan bơna niam ngan tàm tơrbŏ bal gùng lòt ngoh rơngăc wil tơl bơh brê mù tus dà lềng, gah lòt nhơl càr Lâm Đồng kơ̆p gơn tàm dùl kàl Dơ̆ duh kah Bơtau Hùng, dơ̆ ơm rlô chờ ngai 30/4- 1/5, kàl prang nam 2026 bơtàu tơnguh ngan mờ duh hồl ngan.